په خوست کې د پوليسو او لاريون کوونکو ترمنځ نښته کې ۲۵ کسان ټپيان شوي چې د خوست ښار مختلفو روغتونونو ته د درملنې لپاره انتقال شوي دي.
دغه لاريون نن سهار شاوخوا لس بجې د اسمعايل خېلو او مندوزيو ولسوالۍ اړوند د حسن زيو په سيمه کې د صنعتي پارک پر ځمکه د جوړو شويو کورونو د نړولو په غبرګون کې وشو.
د خوست امنيه قوماندان سمونمل اخترمحمد نوروزي امريکاغږ ته وويل چې د ياد شوي لاريون پرمهال د تاوتريخوالي پرمهال ۱۰ پوليس ټپيان شوي، چې د يو شمېر کسانو حالت نازک ښودل شوی دی.
که څه هم قوماندان اخترمحمد نورزی په دغه تاوتريخوالي کې د لاريون کوونکو ټپي کيدل نه مني خو د لاريون ګډونوال وايي چې ۱۵ لاريون کوونکي هم ټپيان شوي دي.
په ورته وخت کې د خوست د ملکي روغتون مشر ډاکټر سخي سردار امريکاغږ ته وويل چې د لاريون له ځايه روغتون ته ۱۲ ټپيان ور وړل شوي چې ۸ ملکيان او ۴ پوليس دي.
عيني شاهدان وايي چې مظاهره کوونکو او پوليسو پر يو او بل د کوتو پر ګوزارونو سربېره دواړو غاړو ډزې هم کړي او يو شمېر کسان له همدې کبله ټپيان شوي دي.
حکومت د صنعتي پارک لپاره ياده بېله شوې ځمکه دولتي بولي او دغلته د جوړو شويو کورونو د نړولو خبر يې ورکړی، خو د سيمې اوسېدونکي وايي چې د دې ځمکې د ملکيت په اړه د محکمې حکم ته انتظار کاږي.
د حکومتي چارواکو په وينا په اسماعيل خېلو او مندوزيو ولسوالۍ کې مجموعاً ۱۴۹۰۰ جريبه دولتي موجوده ده، چې ۴۰۰ جريبه يې د صنعتي پارک لپاره ځانګړې شوې ده.
