په افغانستان کې دېره امریکایي ځواکونه وایي چې په کندهار او فراه ولایتونو کې یې په وسله والو طالبانو هوايي بریدونه کړي دي.
په افغانستان کې د امریکايي ځواکونو ویاند سوني لګیت د جمعې په ورځ مۍ پنځمه (غبرګولي۱۶) یې په خپل ټویټر کې لیکلي وو چې دا بریدونه نن او تېره شپه شوي دي.
هغه لیکلي دي: "امریکايي ځواکونو د افغانستان په فراه ولایت کې (تېره شپه) د طالبانو په هغې ۲۵کسیزې ډلې چې پر افغان ځواکونو یې د برید تابیا لرله، هوايي برید کړی دی. له غرمې وروسته امریکايي ځواکونو په هغو وسله والو طالبانو یې هم هوايي بریدونه کړي چې په کندهار کې یې د افغان پولیسو په پوستو بریدونه کړي وو."
لا معلومات نشته چې په دغو تازه هوايي بریدونو کې څومره وسله وال طالبان وژل شوي دي.
هغه لیکلي دي: "یو ځل بیا ټینګار کوم چې د امریکا-طالبانو د تړون په اساس: ټولې خواوې باید تاوتریخوالی کم کړي او اجازه دې ورکړي چې د سولې بهیر پر مخ ولاړ شي."
نوموړي ویلي دي چې په اختر کې له اوربند وروسته دا په وسله والو طالبانو باندې د بهرنیو ځواکونو لومړني هوايي بریدونه وو.
تر دې مخکې په افغانستان کې د امریکایي ځواکونو قومندان جنرال سکاټ میلر خبرداری ورکړی و که تاوتریخوالی کم نشي، طالبان دې باید د خپلو بریدونو د ځواب په تمه واوسي.
تر دې دمه طالبانو د امریکایي ځواکونو د دغو هوايي بریدونو په اړه څه نه دي ویلي.
د تاوتریخوالي کمول او د افغان حکومت له زندانونو څخه د ۵۰۰۰ طالب بندیانو او د طالبانو سره د ۱۰۰۰ بندي افغان سرتېرو خوشې کول د هغه تړون برخه ده چې امریکا-طالبانو د فبرورۍ په میاشت کې په قطر کې لاسلیک کړ.
دا بریدونه داسې مهال کیږي چې افغان حکومت او نړیوالې ټولنې له طالبانو غوښتي چې اوربند وکړي چې هم د سولې خبرې پیل شي او هم ټولې خواوې د کرونا سره مبارزې ته پام واړوي.
