افغان او امریکایي ځواکونو لومړی ځل د افغانستان په غرب کې د طالبانو د مخدره موادو د تولید پر ځایونو بریدونه کړي.
په افغانستان کې امریکایي ځواکونو د افغان ملي پوځ سره په گډه د فراه او نیمروز په ولایتونو کې د اپریل په درییمه او پنځمه د طالبانو د مخدره توکیو د تولید په ١١ تاسیساتو هوایي بریدونه کړي دي.
په دغو نویو بریدونو سره په افغانستان کې میشتو امریکایي ځواکونو د مخدره توکیو څخه د طالبانو د عایداتو پر وړاندې خپله مبارزه د هلمند ولایت اخوا وغزوله.
دغه بریدونه چې اف ١٦ A-10s او MQ-9s الوتکو کړي لومړني بریدونه دي چې د افغانستان په غرب کې د مخدره توکیو ضد کمپاین په ترڅ کې کیږي.
په افغانستان کې د امریکایي قواو یو قوماندان جنرال جیمز هیکر ویلي دي چې "طالبان به امن ځای ونه لري. مونږ به د هغوی د شبکو لټې ته دوام ورکړو او د هغوی د قابلیت مخه به ونیسو چې مخدره توکي تولید نشي کړای".
جنرال هیکر زیاتوي چې " هغوی {طالبان} یو جنایي سازمان شوی چې د مخدره توکیو د خرڅلاو نه گټه پورته کوي او ددغو پیسو نه د خپلو عملیاتو لپاره کار اخلي چې په کې په عمده توگه افغانان وژل کیږي."
هغه دا هم وویل چې د طالبانو د اقتصادي زیرمو په له منځه وړلو سره به هغوی ونشي کړای چې خپل تروریستي اعمال پرمخ بوزي.
