د متحدو ایالتونو دفاعي چارواکي وایي چې د ګوانتنامو پوځي مرکز د کډوالو له برخې څخه یې پاتې ۴۰ کډوال هم د لویزیانا ایالت ته انتقال کړل او له امریکا څخه تر وتلو پورې به دوی دلته ساتل کېږي.
د امریکا د دفاع وزارت دوو چارواکو، چې نه غواړي نومونه یې په راپور کې ولیکل شي، وویل چې په ۴۰ کسانو کې یې ۲۳ «ناقانونه پردي» دي چې «لوړ تهدید» ګڼل کېږي. وايي دا کسان د امریکا د کډوالو او ګمرکاتو د چارواکو د لارښوونې په اساس په یوې غیر پوځي الوتکې کې انتقال کړل شول.
ولسمشر ټرمپ د جنورۍ په ۲۹مه وویل چې د یو اجرايي فرمان په لاسلیک کولو سره به ۳۰ هغه کډوال، چې په ناقانونه توګه په امریکا کې ژوند کوي او جرمي سابقه لري، ګوانتنامو ته انتقال شي.
ولسمشر ټرمپ ویلي وو: «ځینې (کډوال) یې داسې بد دي، چې ان په هېوادونو یې هم باور نه شو کولای چې وبه یې ساتلای شي، موږ نه غواړو چې هغوی بیا متحدو ایالتونو ته راستانه کړل شي. له همدې کبله هغوی ګوانتنامو ته استوو... دا به سمدستي زموږ وړتیا دوه برابره کړي.»
واشنګټن تېره میاشت د ګوانتنامو پوځي اډې ته د کډوالو انتقال پیل کړ او تر دې دمه د دغې اډې د کډوالو څانګې ته په کم تعداد کې کډوال انتقال شوي وو.
تر دې مخکې امریکایي چارواکو ویلي وو چې څه باندې ۱۲۰ کډوال خطرناک جنایتکاران د «ترن د اراګویا» د بانډ غړي دي، امریکا دغه ډله د یو ترهګر سازمان په توګه پېژني.
د متحدو ایالتونو د کورنيا امنیت وزارت او د کډوالو او ګمرکاتو چارواکو د دغه راپور تر خپرېدو پورې امریکا غږ ته په دې اړه څه نه دي ویلي.
فورم \ دبحث خونه