متحدو ایالتونو یو شمېر نور «جنایتکار» کډوال چې «غټ تهدید» ګڼل شوي، ګوانتنامو ته واستول.
امریکايي چارواکي وايي چې د ګوانتنامو په پوځي اډې کې یې د کډوالو د ساتلو مرکز برابر کړی دی.
د متحدو ایالتونو د دفاع وزارت یو مقام امریکا غږ ته تائید کړه چې دا کډوال د یکشنبې په ورځ د پوځ په یوه بار وړونکې الوتکه کې له تکزاس څخه ګوانتنامو ته ولیږدول شول.
یو بل امریکايي چارواکي ویلي دي چې حداقل ۱۷ کډوال «غټ تهدید» ګڼل شوي او د ګوانتنامو په زندان کې به وساتل شي.
دغو دواړو چارواکو نه دي غوښتي چې نومونه یې په راپور کې ولیکل شي.
د متحدو ایالتونو د داخلي امنیت وزارت چې د ګمرکونو او مهاجرت له ادارو سره په ګډه د کډوالو د شړلو هڅه کوي ګوانتنامو ته د دغو استول شویو کډوالو د هېوادونو، هویت او هغو جرمونو په اړه، چې دا کډوال پرې تورن دي، معلومات نه دي ورکړي.
په همدې حال کې ټاکل شوې چې د متحدو ایالتونو د دفاع وزیر پیت هګست نن سه شنبه فبروري ۲۵ (کب اوم) د دغې پوځي اډې لیدو ته ورشي او د کډوالو د شړلو په اړه پوځي هلې ځلې وارزوي.
د امریکا د دفاع وزارت ویلي دي چې هګست به د مهاجرو د عملیاتي مرکز او ګوانتنامو زندان په ګډون د ګوانتنامو د ټولو ماموریتونو په اړه راپورونه ترلاسه کړي.
د پنټاګون په اعلامیې کې ویل شوي دي چې ګوانتنامو ته د هګست سفر د ګوانتنامو د امنیت او عملیاتي اغیز په اړه د ډاډ ترلاسه کولو لپاره د دفاع وزارت ژمنه څرګندوي.
د متحدو ایالتونو د ګمرکونو او مهاجرت ادارې تېره اونۍ وویل چې ۱۷۷ کسان، چې په ګوانتنامو کې ساتل کېدل، هاندوراس ته واستول شوی چې د ونزویلا حکومت ته وسپارل شي.
تر دې مخکې امریکایي مقاماتو ویلي وو چې په دوی کې یې څه باندې ۱۲۰ کډوال، خطرناک جنایتکاران دي او د ونزویلا د «ترین ډي اراګوا» جنایت کارې ډلې غړي په کې دي. امریکا دا ډله د ترهګر سازمان په توګه پېژني.
دا مهال په ګوانتنامو کې ۱۷۰ کسان ساتل کېږي، له دغې ډلې څخه یې ۵۰ کسان تېره اونۍ له امریکا څخه شړل شوي او هغې برخې کې ساتل کېږي، چې د غیر متشددو خلکو لپاره جوړه شوې.
فورم \ دبحث خونه