د امریکا یو لوړپوړي پوځي قوماندان له خپل چینايي سیال سره کتلي او د چین په جنوبي سمندر کې یې د بیجینګ د "خطرناکو" اقداماتو په خلاف خبرداری ورکړی دی.
واشنګټن او بیجینګ له سوداګرۍ نیولې د تایوان د خپلواک ټاپو تر موضوع پورې او په سمندر کې د ازادو سوداګریزو مسیرونو په وړاندې د چین د جاهطلبۍ په اړه اختلاف لري.
دواړو خواوو تازه د پوځې مشرانو ترمنځ مذاکرت پیل کړي چې اختلافات یې په وسله واله شخړه بدل نشي. د متحده ایالاتو د اینډو-پسیفیک قوماندان سامیول پاپارو سه شنبې سپتمبر ۱۰ (وږي ۲۰) د چین د پوځ د جنوبي برخې له قوماندان سره د ویدیويي تماس له لارې خبرې وکړې.
د متحده ایالاتو د اینډو-پسیفیک قوماندانۍ د اعلامیې له مخې، پاپارو "د امریکا د پوځ او چین د پوځ ترمنځ د مستقیمو خبرو پر دوام ټینګار کړی دی."
پاپارو ویلي: "د لوړپوړو مشرانو ترمنځ دغه ډول خبرې اترې هدفونه مشخص کوي او د ممکنه غیر سوتفاهم او غلطې محاسبې خطر کموي."
خو پاپارو د چین له لورې په دې وروستیو کې"د امریکا له متحدینو سره نامسئونو تعاملاتو" ته اشاره کړې ده او د چین له پوځي مشرتابه څخه یې غوښتي چې "د چین په جنوبي سمندر او ورهاخوا کې د خطرناکو او ممکنه پاروونکو تاکتیکونو له کارولو څخه ډډه وکړي."
د چین د پوځ جنوبي قومانداني د چین د جنوبي سمندر د سیمې مسئولیت لري چیرې چې د چینايي پوځي بیړۍ په وروستیو میاشتو کې له فلیپیني بیړیو سره په جنجال اوښتي دي.
چین د جنوبي چین سمندر خپل بولي که څه هم نړیوالې محکمې د بیجینګ دغه ادعا رد کړې او د سیمې نور هېوادونه په دغو اوبو کې خپل حق شامل ګڼي.
بیجینګ د وروستیو خبرو اترو په اړه وویل چې وو له خپل امریکایي سیال سره "د ګډو اندېښنو په اړه ژورې خبرې اترې" وکړې.
دا د واشنګټن او بیجینګ ترمنځ وروسته له هغه د خپل ډول لومړۍ خبرې اترې دي چې چین په ۲۰۲۲ کې تایوان ته د متحده ایالاتو د استازو جرګې د پخوانۍ رئیسې نانسي پلوسي د سفر په غبرګون کې له متحده ایالاتو سره نظامي اړیکې پرې کړې.
د سپینې ماڼۍ د ملي امنیت سلاکار جیک سولیوان تېره میاشت چین ته سفر وکړ. د سپینې ماڼې د معلوماتو له مخې، سولیوان له چینايي مشرانو سره په کتنه کې پرېکړه کړې وه چې د دواړو خواوو اړوند پوځي مشران به خبرو ته کښیني.
فورم \ دبحث خونه