د امریکا د کالیفورنیا په ایالت کې چارواکي وایي د سمیول لیټل په نامه کس چې پخپله یې د ۹۳ کسانو په وژلو اعتراف کړی، د ۸۰ کالونو په عمر په زندان کې مړ شوی.
سمیول لیټل په امریکا کې مشهور قاتل و چې ډیر کسان یې په پرله پسې توګه وژلي دي.
دغه مشهور قاتل دغه کسان د ۱۹۷۰ نه تر ۲۰۰۵ کاله پورې تقریباً په ټولې امریکا کې وژلي وو او چارواکي یې په نیولو نه و بریالي شوي.
اکثریت کسان چې سمیول لیټل وژلي، میرمنې وې.
لیټل چې په لومړي سر کې د سوک وهنې ورزش یې کاوه، هغه میرمنې ډیرې وژلي چې په مخدره موادو اخته وې او یا په فحشا کې ښکیلې وې.
د اکثریت میرمنو هویت تر اوسه معلوم نشو او نه یې قضیې وڅیړل شوې.
سمیول لیټل په زندان کې د فدرالي تحقیقاتو د ادارې اجنټانو ته د ۵۰ کسانو نومونه واخیستل چې هغه وژلي وو. دې ادارې تائید کړله چې د سمیول ټولې ادعاګانې د اعتبار وړ دي.
پولیسو ویلي چې سمیول لیټل د چارشنبې په ورځ مړ شوی خو د مرګ علت یې تر اوسه معلوم ندی.
دغه مشهور قاتل په ۲۰۱۴ کال کې بندي شو او د عمري قید سزا پرې راختلې وه.
سمیول لیټل د امریکا د اوهایو په ایالت کې غټ شوی. ښوونځی یې په نیمایي کې پریښود او بې کوره و.
د فدرالي تحقیقاتو ادارې ویلي چې دې قاتل د مخدره موادو د اخیستو لپاره د دکانونو او نورو ځایونو نه غلاوې کولې.
د سمیول لیټل لومړنی جرم په ۱۹۵۶ کال کې وروسته تر هغه ثبت شو چې د غلا، دوکې، مخدره موادو او په زور د یو چا کور ته د ننوتلو په جرم ونیول شو.
په هغه دا تور هم و چې د ۱۹۸۰ په لسیزه کې یې د فلوریډا او مسیسیپي په ایالت کې میرمنې وژلې وې خو پدې جرمونو کې مجرم ثابت نشو.
د امریکا په مطبوعاتو کې ویل شوي چې پدې قاتل څه موده وړاندې د زړه حمله رغلې وه او د شکرې ناروغي یې هم درلوده.