په افغانستان کې یو شمېر ښځینه فعالانو په ټولنیزو رسنیو کې زما نوم چیرې دی تر سرلیک لاندې د ښځو د هویت د ترلاسه کولو یو کمپاین پېل کړی.
افغانې فعالانې وايي چې لا هم په افغانستان کې ښځې په خپل نوم نه بلکې د پلار، ورور او خاوند په نوم پېژندل کیږي.
دوی وايي غواړي د دې کمپاین له لارې خلک وپوهوي چې ښځو ته خپل نوم ورکړي او دا شرم نه دی.
دا کمپاین چې د یو هشټګ (زما نوم چیرې دی) لاندې پېل شوی چلوونکې یې وايي چې تر هغه به په دې اړه کمپاین کوي چې د ښځو د هویت په برخه کې مثبت بدلون راځي.
تهمینه رشیق چې د دې کمپاین له پېلوونکو ده وايي په افغانستان کې لا هم زیات شمېر خلک د ښځو نوم یادول شرم ګڼي او ښځې د نارینه وو په نوم پېژندل کیږي. دا وايي په دې کمپاین کې ځینې نارینه هم ورسره دي.
د دې کمپاین یو بله غړې بهار سهیلي وايي ښځو د هویت د ترلاسه کولو په دې کمپاین کې لومړی له افغان مېرمنو پوښتنه کوي چې نوم مو چیرې دی؟
بل خوا د رواني او ټولنیزو چارو متخصص شرف الدین عظیمي وايي د ښځو په نوم شرمېدل له نر سالارو کورنیو پیلیږي، چې پر ټولنه اغېز کوي او بالاخره په کلتور بدلیږي.
د ښځو د هویت په اړه د دې کمپاین غړي وايي چې کمپاین یې په پراخېدو دی او هیله لري چې په دې برخه کې به مثبتې پایلې به ولري.