په هند کې د صدراعظم نریندرا مودي د واک د درېیمې دورې له پیل سره، نوي ډهلي له متحده ایالاتو سره د پرمختللې ټکنالوژۍ په برخه کې د همکارۍ د پراخولو موافقه کړې ده.
دا موافقه د هند پایتخت نوي ډهلي ته د سپینې ماڼۍ د ملي امنیت سلاکار جیک سولیوان د سفر په ترڅ کې شوې ده
سولیوان د دې سفر په ترڅ کې له مودي او خپل هندي سیال برسېره د هند د بهرنیو چارو له وزیر سره وکتل او ټینګار یې وکړ چې دواړه هیوادونه به نږدې اړیکې پراخې کړي.
مودي د دوشنبې په ورځ جون ۱۷ (غبرګولي ۲۸) له سلیوان سره له لیدنې وروسته په خپل ایکس حساب کې لیکلي: "هند د نړیوالې ښېګڼې لپاره د هند او متحده ایالاتو تر منځ د هراړخیزې نړیوالې ستراتیژیکې ملګرتیا لا پیاوړتیا ته ژمن دی."
د سولیوان د دې سفر اصلي موخه د هند د ملي امنیت د سلاکار اجیت دووال سره لیدل وو ترڅو د دواړو هیوادونو ترمنځ د دفاع، سیمی کنډکټرونو، جي۵ بې سیم شبکې او مصنوعي استخباراتو په شمول د پرمختللې ټکنالوژۍ په برخه کې د همکاریو د پراخولو د هغه نوښت په اړه خبرې وکړي چې تېر کال د جنوري په میاشت کې رامنځته شو.
دا مطلب هم ولولئ امریکا او هند په پوځي صنعت کې په همکارۍ توافق وکړد دواړو هېوادونو ترمنځ د ستراتیژیکو همکاریو د پراخولو لپاره ددې نوښت یوه موخه د چین د نفوذ محدود کول ښودل شوي دي.
په نوي ډیلي کې د "ابزرور" څېړنیز مرکز شنونکی مانوج جوشي وايي: "د مودي د نوي حکومت په لومړنیو ورځو کې د سولیوان دا سفر ښيي چې متحده ایالات غواړي له هند سره د پرمختللې ټکنالوژۍ په برخه کې د همکاریو د پراخولو هلې ځلې جاري وساتي."
د سولیوان او دووال له لیدنې وروسته د دواړو مشرانو له خوا په لاسلیک شوي تفاهم لیک کې راغلي چې دوی د متحده ایالاتو او هند ترمنځ د سیمي کنډکټرونو، دقیقو نښه ویشتونکو مهماتو او د ملي امنیت اړوند نورو بریښنايي الاتو په برخه کې په ستراتیژیکې همکارۍ سلا شوي دي.
د تفاهم لیک له مخې، دواړو مشرانو همدارنګه په جنوبي امریکا کې د لیتیم د زیرمو په پروژو کې د ګډې پانګونې، په افریقا کې د قیمتي ډبرو "د عرضې د تنوع" پراخولو او په جګړه کې د استعمالېدونکو وسایلو او سیستمونو د ګډ تولید پرېکړه کړې ده.
مودي هڅه کوي چې د وسلو جوړولو داخلي سکتور ته وده ورکړي او په وارداتي وسلو باندې خپله تکیه کمه کړي. نوي ډیلي که څه د پوځي تجهیزاتو واردات متنوع کړي خو بیا هم تر ډېره پر روسیې تکیه کوي.
د هند لپاره د پرمختللې ټکنالوژۍ په برخه د ظرفیتونو لوړول لومړیتوب بلل کیږي ځکه چې دا کار د هیواد د امنیت د پیاوړتیا لپاره مهم ګڼل شوی دی.
جوشي وویل: "هند غواړي چې د پرمختللي ټکنالوژۍ په برخه کې یو له مخکښو هیوادونو څخه شي او دا د نوي ډیلي لپاره خورا ګټور دي چې د متحده ایالاتو سره ملګرتیا وکړي... نظر دا دی چې ګډ تولیدات رامنځته شي او ددې لپاره امریکایي شرکتونه راجلب شي چې په هند کې مرکزونه پرانیزي."
دا مطلب هم ولولئ کوګلمن: افغانستان څخه له وتلو وروسته سویلي اسیا کې د امریکا تمرکز پر هند دیسولیوان د هند د بهرنیو چارو له وزیر سوبرامانیان جیشنکر سره هم وکتل. هغه د مودي په نوې اداره کې پر خپل مقام پاتې شوی او دا څرګندوي چې هند خپلې بهرنۍ تګلارې ته د تېر په څېر دوام ورکوي.
جیشنکر د خپل ایکس شبکې په حساب کې لیکلي: "ډاډمن یو چې زموږ په نوې دوره کې به د هند او متحده ایالاتو ترمنځ د ستراتیژیکې ملګرتیا پراختیا دوام وکړي."
په واشنګټن کې، د سپینې ماڼۍ د ملي امنیت ویاند جان کربي د دوشنبې په ورځ خبریالانو ته وویل چې هند او متحده ایالات "د دوستۍ ځانګړې اړیکه پالي او هند ته د ښاغلي سلیوان سفر به د متحده ایالاتو او هند تر منځ قوي ملګرتیا نوره هم ژوره کړي ترڅو یو خوندي او سوکاله هند-پاسیفک رامنځته شي."
له واشنګټن سره د نوي ډیلي اړیکې په دې وروستیو کلونو کې د چین د ځواک ښودنې په اړه د دواړو هیوادونو د متقابلو اندیښنو په لړ کې پراخې شوې دي. نوی ډیلي له بیجینګ سره د همالیا په غرونو کې د خپلې ګډې پولې په سر اختلاف لري. د دواړو هېوادونو پوځونه څلور کاله وړاندې پر دغه پوله په جګړه کې ښکېل شوي وو او دا مسئله تراوسه حل شوې نده.