د کامې ولسوالۍ د شیخانو سیمې کروندګر سبحان الله، چې په یو جریب ځمکه کې یې ګني کرلي دي، وایي، د ګنیو کر کیله له نورو فصلونو غوره ده ، ځکه زحمت یې کم او حاصلات او عواید یې زیات دي. هغه امریکاغږ وویل، چې د ګنیو حاصلات په یو جریب ځمکه کې تر ۴۰ یا ۵۰ زره افغانیو پورې رسېږي.
هغه وايي، یو جریب ځمکه تر ۱۲۰۰ منه پوري د ګنیو حاصلات ورکوي او ښه والی يې دا دی، چې یو کال دې وکرل تر راتلوونکو درې یا څلورو کالو پورې حاصل ورکوي. د نوموړي په خبره، که حکومت د کیمیاوي سرو، اصلاح شویو تخمونو او وسایلو په برخه کې مرسته وکړي، نو د کروندګرو اقتصاد به د پام وړ پرمختګ وکړي.