افغان حکومت د کونړ ولایت پر ځینو برخو د "پاکستان د توغندیو بریدونه" په کلکه غندلي دي.
د ولسمشر محمد اشرف غني ویاند صدیق صدیقي وايي "د افغانستان حکومت پر افغان خاورې د پاکستان وروستي راکټي بریدونه په کلکه غندي. زموږ په باور د پاکستان دا عمل د نړیوالو اصولو خلاف دی او په افغانستان او سیمې کې د سولې او ثبات په برخه کې د پاکستان نه ژمنتیا ښکاره کوي."
حکومت افغانستان راکت پراگنی های اخیر پاکستان را بر خاک افغانستان به گونه ای شدید محکوم می کند. به باور ما این عمل پاکستان، در مخالفت صریح با اصول بین المللی بوده و نشانه ای از عدم تعهد این کشور در امر تامین صلح و ثبات در افغانستان و منطقه می باشد.
— Sediq Sediqqi (@SediqSediqqi) August 22, 2019
ښاغلي صدیقي د پنجشنبې په ورځ (اګست۲۲) دا خبره په خپل ټویټر کې لیکلې ده.
همدا تېره ورځ د کونړ والي عبدالستار میرزکوال وویل چې په تېرو شاوخوا اتو ورځو کې د " شلټن او دانګام پر ولسوالیو د پاکستان راکټي او توپچي بریدونه نهایت زیات شوي دي."
هغه وویل چې په دغې مودې کې " پاکستان ۷۲۰ راکټي او توپچي" بریدونه کړي دي. ښاغلي میرزکوال وویل چې په دغو بریدونو کې د ځایي خلکو ځینې څاروي وژل شوي او کورونه یې زیانمن شوي دي، خو څوک وژل شوي او ژوبل شوي نه دي.
پاکستان لا تر دې دمه د افغان حکومت د دغو څرګندونو په اړه څه نه دي ویلي، خو تر دې مخکې یې ویلي وو چې په کونړ کې پر هغو ځایونو بریدونه کوي چې د پاکستاني چارواکو په خبره ترهګر ترې پاکستاني پوځ او خاوره په نښه کوي.
افغان چارواکي وايي له څو کلونو راهېسې د ډیورېنډ له بلې غاړې "پاکستانی پوځ" پر افغان خاورې د توغندیو بریدونه کوي.
افغان حکومت داسې مهال پاکستان په افغانستان کې د سولې او ثبات په "عدم تعهد" تورن کړی دی چې پاکستان ویلي د افغانستان د سولې په بهیر کې مرسته کوي.
څو میاشتې مخکې د پاکستان حکومت وویل چې د دوې په هلو ځلو طالبان د سولې خبرو ته راغلل.