د افغانستان د سولې او بیا پخلاینې لپاره د متحدو ایالتونو ځانګړي استازي زلمي خلیلزاد د ولسي افغانانو په تلفاتو اندېښنه ښودلې ده.
ښاغلي خلیلزاد د ولسي تلفاتو په اړه د یوناما راپور ته په کتو هيله ښودلې ده چې په راتلونکي کې دا تلفات ختم او یا کم شي.
نوموړي په خپل ټویټر کې لیکلي دي "طالبان وایي، اوربند د مذاکراتو په اجنډا کې نشته، خو زموږ لپاره سوله اجنډا ده. افغانانو ډېرې جګړې وګاللې او اوس د جنګ پای غواړي. متحده ایالتونه له هغوی سره دي. زه طالبان هڅوم چې له نورو افغانانو سره په ګډه دا کال د سولې کال کړي."
(3/3) The Taliban say “a ceasefire is not part of the agenda." For us, peace is the agenda. The Afghan people have had enough violence & want an end to the war. The United States stands with them. I challenge Talibs to join other Afghans and work to make this the year of peace.
— U.S. Special Representative Zalmay Khalilzad (@US4AfghanPeace) April 25, 2019
زلمی خلیلزاد دا مهال افغانستان او د سیمې ځینو نورو هېوادونو ته په سفر دی چې د افغان سولې لپاره ملاتړ ترلاسه کړي. ټاکل شوې چې په قطر کې بیا د ښاغلي خلیلزاد او طالب استازو ترمنځ د سولې خبرې وشي. امریکايي چارواکي وايي په تېرو خبرو کې پرمختګونه شوي خو لا کوم تړون نه دی شوی.
نوموړی داسې مهال په افغانستان کې پر ملکي تلفاتو خواشينې ښودلې ده چې یوناما وايي د روان ۲۰۱۹ کال په لومړیو درې میاشتو کې د تاوتریخوالي په پېښو کې ۵۸۱ ملکیان وژل شوي او ۱۱۹۲ نور ټپيان شوي دي.
یوناما د چهارشنبې په ورځ د (غويي میاشتې پر ۴مه) په خپل راپور کې ویلي په دغو کسانو کې ۱۵۰ ماشومان هم وژل شوي او او ۴۳۲ نور ټپيان شوي دي.
راپور وايي چې د یادو تلفاتو ۳۴ سلنه د حکومت ملاتړو ځواکونو، ۳۹ سلنه د طالبانو، ۱۲سلنه د داعش او ۳ سلنه نور د ناڅرګندو ډلو لخوا اوښتي دي.