نن سه شنبه سپتمبر ۷ (وږي۱۶) په کابل کې یو شمېر ښځو د پاکستان سفارت په مخکې مظاهره وکړه.
لاریون کوونکو د پاکستان په خلاف شعارونه ورکول او چېغې یې وهلې: «موږ مستقل افغانستان غواړو». دوی د افغانستان په چارو کې یې د پاکستان د لاسوهنې د بندیدو غوښتنه هم کوله.
لاریون کوونکو ښځو کله چې د پاکستان سفارت ته د ننوتلو هڅه کوله، د سفارت طالب ساتونکو یې مخه ونیوله.
د ښځو له لاریون سره سلګونه نارینه هم یو ځای شول چې د سفارت مخ ته د لنډ توقف وروسته د سفارت ساتونکو وشړل.
د طلبوع نیوز خبري شبکې مشر لطف الله نجفیزاده، په یو ټویټ کې لیکلي: «د رسنیو کمرې مصادره شوي، له خبریالانو غوښتل شوي چې فلمبرداري ونه کړي او د یو شمیر مخه نیول شوې...د مظاهرو کولو آزادي او په اړه یې د رپوټ ورکولو آزادي چیرته ده؟»
Kabul protest for freedom. Afghanistan 2021. pic.twitter.com/jOnZ4TiwtA
— Lotfullah Najafizada (@LNajafizada) September 7, 2021
دا مظاهرې داسې مهال کیږي چې تېره ورځ د طالبانو له لوري د پنجشیر تر نیولو وروسته د «ملي مقاومت د جبهې» مشر احمد مسعود په افغانانو غږ وکړ چې د «طالبانو په ضد ملي پاڅون» وکړي.
داسې رپوټونه هم شته چې طالب جنګیالیو یو شمیر مظاهره کوونکي ښځې د کابل ښار د یو بانک په ګاراج کې قید کړې وې.
هندي خبریال ادیتا راج کال چې مختلفو نړیوالو رسنیو ته رپوټونه برابروي د ښځو یوه ویدیو یې ټویټ کړې چې د موټرو په یو پارکینګ کې لیدل کیږي.
هغه لیکلي: «طالبانو افغانې میرمنې حبس کړي چې نن یې په کابل کې د پاکستان د ترهګرۍ پر ضد اعتراض کاوه.»
Taliban has detained Afghan women who were protesting against Pakistani terrorism in Kabul today. Reports that journalists who were covering the protest have been arrested as well and cameras confiscated. This is Taliban 2.0. Terrorists never change. pic.twitter.com/dXof3bszfo
— Aditya Raj Kaul (@AdityaRajKaul) September 7, 2021
په افغانستان سربېره په واشنګټن کې هم یو شمېر افغانانو مظاهرې وکړې او له ایران څخه هم د افغانانو د یوې مظاهرې راپور ورکړل شوی دی.
د سه شنبې تر مظاهرو مخکې په کابل، هرات او بلخ کې هم ښځو او د مدني ټولنو فعالانو مظاهرې کړې وې او د افغانستان په راتلونکي نظام کې یې دښځو ونډه او د حقونو خوندیتوب غوښته.
د طالبانو ویاند ذبیح الله مجاهد تیره ورځ د ښځو د لاریونونو په باب وویل چې دا لاریونونه تر وخت مخکې دي. هغه وویل حکومت لا جوړ شوی نه دی او داسې یوه مرجعه لا معلومه نه ده چې د دغو لاریون کوونکو غوښتنو ته ځواب ووايي.
یو شمېر مظاهرې کوونکې ادعا کوي چې طالبانو ورسره بد چلند کړی دی او وهلې او ډبولې یې هم دي.