د افغانستان کرکټ بورډ وايي چې د ۱۹ کلنو د کرکټ په نړیوال جام کې به افغان لوبڅار احمد شاه پکتین لوبڅاري وکړي.
د بورډ په اعلامیې کې راغلي دي چې ښاغلی پکتین د سه شنبې په ورځ (جنوري۷) جنوبي افریقا ته روان شو.
د ۱۹ کلنو د کرکټ نړیوال جام سیالۍ په جنوبي افریقا کې کیږي چې افغانستان هم په کې برخه لري.
په اعلامیې کې راغلي: "احمد شاه پکتین به د نړیوال جام پر مهال په رسمي او تمریناتي سیالیو کې د نړۍ د نورو مخکښه لوبڅارانو ترڅنګ لوبغالي کې دننه او د احتیاطي لوبڅار په توګه دنده ترسره کړي."
ښاغلی پکتین لمړی افغان دی چې د کرکټ د دغه نړیوال جام په سیالیو کې لوبڅاري کوي.
د کرکټ نړیوال جام سیالۍ د جنوري په ۱۷ پیلیږي او د فبرورۍ په نهمه ختمیږي. د افغانستان د کرکټ د ۱۹ کلنو لوبډله له جنوبي افریقا، کاناډا او متحدو عربو اماراتو سره لوبې لري.