د برتانیا شهزاده او د ملکې الیزابیت مېړه فلیپ مړ شو.
د برتانیا د بکېنګهم ماڼۍ نن جمعه د اپریل په نهمه (وري۲۰) د هغه د مړینې خبر خپور کړ.
شهزاده فلیپ ۶۹ کاله له ملکې الیزابیت سره ګډ ژوند وکړ او په دغې مودې کې یې ښه نوم وګاټه.
د بکینګهم په اعلامیې کې راغلي دي: «په ډېر خپګان سره ملکه الیزابیت د خپل مېړه شهزاد فلیپ د مرګ خبر خپروي.»
شهزاده فلیپ ۹۹ کلن و چې مړ شو.
اعلامیه وايي چې شهزاده فلیپ د جمعې د ورځې په سهار مړ شوی دی او د هغه د تدفین او تجهیز د مراسمو په اړه نور معلومات وروسته خپریږي.
شهزاده فلیپ په ۱۹۴۷ کې له ملکې الیزابیت سره واده وکړ او له دویمې نړیوالې جګړې څخه وروسته د سلطنت په عصري کولو کې مهم رول ولوباوه.
رویټرز خبري اژانس وايي چې ملکه الیزابیت پر شهزاده فلیپ ډېر اعتماد درلوده او هغه یې خپل قوت ګاڼه.