افغان چارواکي وایي، د کابل په پغمان ولسوالۍ کې د یوې ترافیکي پېښې له امله ۷ تنه مسافر مړه شوي او ۷۰ تنه نور ټپیان شوي دي.
د کورنیو چارو وزارت ویاند طارق ارین نن سې شنبه اپرېل ۲۷ (غوايي ۷) خبریالانو ته وویل چې دغه پېښه د کابل په «ارغندۍ» سیمه کې د دوو ۴۰۴ مسافر وړونکو موټرو د ټکر له امله رامنځته شوې ده.
هغه وویل چې د پېښې ټول قربانیان مسافر دی او په وینا یې ښځې او ماشومان هم پکې شامل دي.
د کورنیو چارو وزارت ویاند همدارنګه زیاته کړه چې (پولیس ترافیک) سیمې ته رسېدلي او د پېښې ټپیان یې روغتون ته انتقال کړي دي.
طارق ارین په پېښه کې د ټپي شوو کسانو د روغتیايي حالت په اړه څه نه دي ویلي، خو د راپورونو له مخې د ځينو ټپیانو حالت خراب ښودل شوی دی.
څلور ورځې مخکې د کابل ـ کندهار د لویې لارې پر سر په زابل ولایت کې هم د یوې ترافیکي پېښې له امله ۱۴ تنه مسافر وژل شوي وو او ۱۰ تنه نور ټپیان شوی وو.
په افغانستان کې د ترافیکي پېښو زیاتوالی تر ډيره حده د موټر چلوونکو بې احتیاطي، د لارې خرابولی او د لارې په اوږدو کې د ترافیکي نښو نشتوالی بلل کیږي.