د افغانستان د بشري حقونو خپلواک کمېسیون وایي په دغه هیواد کې د تاوتریخوالي د زیاتوالي او په ځانګړي ډول د طالبانو او افغان سرتیرو جګړو کې د ملکي وګړو د مرګ ژوبلې په اړه اندېښمن دي.
د یاد کمېسیون ویاند ذبیح الله فرهنګ نن یکشنبه اپرېل ۴ (وري ۱۵) امریکا غږ ته وویل چې د وري میاشتې پر ۱۳مه نېټه د لغمان ولایت په علیشنګ ولسوالۍ کې د دواړو لورو ترمنځ جګړه کې د ښځو او ماشومانو په ګډون ۲۱ ملکي وګړي ټپیان شوي دي.
هغه وویل: "بدبختانه موږ د تاوتریخوالي شاهدان یو، هره ورځ دافغان سرتیرو او طالبانو ترمنځ جګړه کې ملکي وګړي قرباني کیږي."
۱/د افغانستان د بشر حقونو خپلواک کميسيون موندنې ښيي چې د ۱۴۰۰ د وري پر ۱۳مه نېټه د لغمان ولايت د عليشنګ ولسوالۍ په کوټالي سيمه کې د امنيتي ځواکونو او وسلهوالو طالبانو تر منځ نښته کې د ۸ ښځو او ۱۰ ماشومانو په ګډون ۲۱ تنه ټپيان شوي دي او د سيمې خلکو ته مالي زيانونه هم اوښتي دي.
— AIHRC (@AfghanistanIHRC) April 4, 2021
هغه وویل چې په وروستۍ اونۍ کې ګڼ شمېر کسان په ماین چاودنو، هدفي بریدونو او هوايي بریدونو کې مړه او ټپيان شوي دي.
د افغانستان د بشري حقونو خپلواک کمېسیون د ویاند په وینا د تاوتریخوالي ختمولو او اوربند ټینګېدل د افغانستان د خلکو اساسي غوښتنه ده او په وینا ښکېل لوري یې باید ومني.
د افغانستان د کورنیو چارو وزارت تیره ورځ وویل چې د تیرې جمعې په ورځ په لغمان، تخار، سرپل، خوست او ننګرهار کې د سرک غاړې ماین چاودنو له امله شپږ ملکیان وژل شوي او ۲۱ تنه نور ټپیان شوي دي.
د کورنیو چارو وزارت د یادو ماین چاودنو مسؤلیت پر وسله والو طالبانو اچولی، خو طالبانو تر دا مهاله په دې اړه څه نه دي ویلي.