د ماشومانو لپاره د ملګرو ملتونو د ملاتړ صندوق (یونیسف) یو ځل بیا په دغه هیواد کې خوارځواکۍ د زیاتوالي په اړه د اندېښنې په ښودلو سره ویلي که بېړنی اقدام ونشي ممکن په افغانستان کې یو میلیون ماشومان د سختې خوارځواکۍ له امله مړه شي.
یونیسف نن چهارشنبه فبرورۍ نهمه (سلواغې ۲۰) په خپل ټویټر پاڼه کې له نړیوالو په دغې برخې کې د پاملرنې غوښتنه کړې ده.
یونیسف ویلي د سوریا په نوم دوه کلنه افغان ماشومه چې دوې اونۍ مخکې یې درملنه کړې وه، اوس بیرته په خوارځواکۍ د اخته کېدو له امله روغتون ته انتقال شوې ده.
Having recently recovered from acute watery diarrhea, two years old Soria is back in hospital, this time suffering from edema and wasting. Her mother has been by her bedside for the past 2 weeks anxiously waiting for Soria to recover. pic.twitter.com/CyjAMqKDxP
— UNICEF Afghanistan (@UNICEFAfg) February 9, 2022
یونیسف ویلي چې یاده نجلۍ اوس تر درملنې لاندې ده.
یونیسف په تیر ډسمبر کې هم ویلي وو چې د مېندو او ماشومانو د مړینې د مخنیوي لپاره، افغانستان تر بل هر وخت زیات بشري مرستو ته اړتیا لري.
یاد سازمان ویلي چې اوس مهال زیاتې کورنۍ د ژمي په رارسېدو سره د خپلو ماشومانو لپاره د خوړو برابرولو توان نلري او د دغه وضعیت دوام د افغانستان ګڼ اوسېدونکي اندېښمن کړي دي.
تر دې مخکې ملګرو ملتونو ویلي وو چې اوسمهال ۳.۲ میلیونه افغان ماشومان د خوارځواکۍ له جدي خطر سره مخامخ دي.
د یو بل خبر له مخې د روغتیا نړیوال سازمان ویلي چې دغه سازمان په دغه هیواد کې د روغتیايي سکتور برخه کې خپلو مرستواو همکاریو ته دوام ورکوي. دغه سازمان زیاته کړې چې اوس مهال په ټول افغانستان کې څه باندې ۲۳۰۰ روغتیايي مرکزونه فعال دي او د روغتیا نړیوال سازمان، یونیسف او نور بنسټونه د دغه روغتونونو سره همکاري کوي.
د روغتیا نړیوال سازمان د معلوماتو په اساس هغوی په وروستیو میاشتو کې د روغتیايي برخې د ټولو کار کوونکو معاشونه او د یادو روغتونونو لپاره درمل، او نور اړین طبي تجهیزات برابر کړي دي.
دغه سازمان ټینګار کړی چې دوی له خپلو همکارانو سره هڅه کوي چې د روغتیايي خدماتو وړاندې کولو په هدف یا روغتونونه فعال وساتل شي.