په کابل کې د پاکستان سفارت د یوې اونۍ لپاره د وېزې ورکولو څانګې د تړل کېدو خبر ورکړی دی.
د پاکستان سفارت په یوې اعلامیې کې ویلي چې یاده څنګه به سر له نن یکشنبې جون له ۱۳ مې بیا د یادې میاشتې تر ۱۷ مې نېټې تړلې وي.
په اعلامیه کې ویل شوي چې دغه پرېکړه په افغانستان کې د کرونا ویروس د مثبتو پېښو زیاتېدو ته په کتو شوې ده.
خو په کابل کې د پاکستان سفارت د دې ترڅنګ ویلي چې د وېزې ورکولو چارې به په انلاین بڼه روانې وي.
په کابل کې د پاکستان د سفارت ویاند تر دې مخکې رسنیو ته ویلي و چې په ورځ کې په عادي توګه ۱۵۰۰ افغانان د وېزې تر لاسه کولو لپاره دغه سفارته مراجعه کوي.
تر پاکستان مخکې په کابل کې د امریکا سفارت هم ویلي و چې د کروناویروس مثبتو پېښو زیاتېدو ته په کتو به نن یکشنبه د خپل سفارت د وېزې ورکولو څانګه د لنډ مهاله لپاره وتړي.
په افغانستان کې په دې وروستیو کې د کرونا ویروس مثبتې پېښې زیاتې شوي دي.
د افغان روغتیايي چارواکو په وینا په افغانستان کې د کرونا ویروس د ټولو مثبتو پېښو شمېر ۸۹۸۶۱ او له یاد ویروس څخه د ټولو مړو شوو کسانو شمېر ۳۵۲۷ تنو ته رسېدلی دی.
په افغانستان کې د کرونا ویروس پراخېدو له امله دولتي او خصوصي پوهنتونونه، ښوونځي او نورې تعلیمي ادارې هم رخصت شوي دي.