په افغانستان کې د امریکايي ځواکونو ویاند سوني لیګت وايي امریکايي ځواکونو تېره شپه د میدان ولایت په نرخ ولسوالۍ پر وسله والو طالبانو هوايي برید کړی دی.
نوموړي نن دوشنبه اکتوبر۲۶ (لړم۵) پر خپل ټویټر لیکلي چې دغه برید د امریکا او طالبانو د دوحې تړون سره سم د افغان ځواکونو د دفاع لپاره شوی او پنځه وسله وال طالبان په کې وژل شوي دي.
USFOR-A conducted a targeted strike in Nerkh, Wardak last night- in defense of the ANDSF and in accordance with the U.S.-TB Agreement- killing 5 Taliban fighters. We reject the allegations of violating the agreement and of killing innocent Afghans.@Zabehulah_M33 @IeaOffice
— USFOR-A Spokesman Col Sonny Leggett (@USFOR_A) October 26, 2020
وسله والو طالبانو بیا ویلي چې تېره شپه د امریکايي ځواکونو د بې پیلوټه الوتکې په برید کې د میدان ورګ ولایت د نرخ ولسوالۍ په دراني سیمه کې درې ماشومان وژل شوي دي.
د طالبانو ویاند ذبیح الله مجاهد د یاد برید په تر سره کېدو سره امریکايي ځواکونه د امریکا او طالبانو ترمنځ د دوحې تړون څخه په سرغړونې تورن کړي دي.
خو په افغانستان کې د امریکايي ځواکونو ویاند سوني لیګت ویلي چې د یاد برید په ترسره کېدو سره د دوحې تړون او ملکیانو د وژل کېدو په اړه ادعاوې ردوي.
په افغانستان کې مېشتو امریکايي ځواکونو تر دې مخکې هم له افغان ځواکونو څخه د دفاع لپاره پر طالبانو هوايي بریدونه تر کړي دي.
د امریکا او طالبانو ترمنځ د سولې تړون د روان کال په فبرورۍ میاشت کې لاسلیک شو چې له مخې پر یو او بل یې د برید نه کولو موافقه هم شوې وه.