په هند کې د ټاکنو د لومړنیو نتایجو په اساس د اوسني صدراعظم نریندرا مودي ګوند، بهارتیا جنتا، مخکې دی.
د هند د ټاکنو کمیسیون د معلوماتو په اساس د ښاغلي مودي ګوند د هند د پارلمان د ۵۴۳ څوکیو له ډلې تر دې دمه ۳۰۰ څوکۍ ګټلې دي، خو رایه شمېرنه لا بشپړه نه ده.
ښاغلي مودي وار دمخه د خپل بري اعلان کړی دی. هغه په خپل ټویټر کې لیکلي دي "موږ یو ځای وده کو او په ګډه به یو غښتلی او ټولشمول هند جوړوو. هند بیا وګټله".
सबका साथ + सबका विकास + सबका विश्वास = विजयी भारतTogether we grow. Together we prosper. Together we will build a strong and inclusive India. India wins yet again! #VijayiBharat
— Chowkidar Narendra Modi (@narendramodi) May 23, 2019
په همدې حال کې ولسمشر غني ښاغلي مودي ته د ټاکنو مبارکي ورکړې ده او هیله یې ښودلې ده چې دواړه هېوادونه به د سیمه ایزې همکارۍ او په جنوبي اسیا کې د سولې او ثبات لپاره خپلې اړیکې پراخې کړي.
Congratulations to PM @narendramodi on a strong mandate from the people of India. The government and the people of Afghanistan look forward to expanding cooperation between our two democracies in pursuit of regional cooperation, peace and prosperity for all of South Asia.
— Ashraf Ghani (@ashrafghani) May 23, 2019
په ټاکنو کې د ښاغلي مودي بري د ملي کانګرس ګوند هیلې خاورې کړې چې د ټاکنو د ګټلو هوډ یې لرلو.
منتقدین د ښاغلي مودي واکمن ګوند په هند کې د مذهبي اقلیتونو په ځپلو تورنوي، په ځانګړي ډول له مسلمانانو سره د هغوی چال چلند د غندلو وړ ګڼي. دهند په څه باندې یو ملیارد نفوس کې شاوخوا ۱۷۰ میلیون یې مسلمانان دي. خو واکمن ګوند تل دا ډول تورونه رد کړي دي.
د هند په دغو ټاکنو کې شاخوا ۶۷۰ سیاسي ګوندونو او ډلو لږ تر لږه ۸۰۰۰ کسان کاندیدان کړي وو.
د هند د ټاکنو کمیسیون وايي شاوخوا ۹۰۰ میلیون هندیانو په ټاکنو کې د رایو ورکولو حق درلود چې په نړۍ کې بیساری بلل کیږي.
ټاکل شوې چې د هند د ټاکنو وروستۍ پایلې د پنجشنبې (مۍ۲۳) د ورځې په پای او یا د جمعې په سهار اعلان شي.