د امریکا د بهرنیو چارو وزیر په یمن کې حوثي یاغیانو ته د استول کېدونکو وسلو له نیولو وروسته پر نړیوالو غږ کړی دی چې باید د ایران پر ضد متحد شي.
پمپیو همدغه راز پر ایران د بندیزونو د لګولو پر دوام هم ټېنګار کړی دی.
نوموړي د جمعې په ورځ (فبروري۱۴) په خپل ټویټر کې د ایران د نیول شویو وسلو تصویر خپور کړی دی او لیکلي یې دي: "د امریکا د متحدو ایالتونو بحري ځواکونو ۳۵۸ هغه وسلې نیولې چې په ایران کې جوړې شوې او په یمن کې حوثي یاغیانو ته انتقالېدې. "
The U.S. Navy interdicted 358 Iranian-made missiles + other weapons components on their way to the Houthis in Yemen. This is another example of the world’s largest state sponsor of terror the Islamic Republic of Iran continuing to defy the UN Security Council. pic.twitter.com/vPOaoIpChU
— Secretary Pompeo (@SecPompeo) February 14, 2020
ښاغلي پمپیو لیکلي دي چې دا کار د دې ښکارندوی دی چې ایران "چې په نړۍ کې د تروریزم لوی ملاتړی دی" هماغسې سرغړونې کوي. هغه پر نړیوالو غږ کړی دی چې باید د ایران تاوتریخوالی رد او پر هغه هېواد د لګول شویو بندیزونو په دوام ټېنګار وکړي.
د امریکا د وسله والو ځواکونو قومندانۍ د پنجشنبې په ورځ (فبروري۱۴) اعلان وکړ چې د عربو په سمندر کې د ایران ساخت یو شمېر وسلې یې نیولي دي.
په دغو وسلو کې د ټانک ضد ۱۵۰ د راکټ مرمۍ، درې هغه راکټونه چې له ځمکې هوا ته توغندي توغوي، دوربینونه او ځینې نور مهمات شامل دي. سعودي عربستان هم ایران په یمن کې د حوثي یاغیانو په ملاتړ تورنوي.