د روسیې د بهرنیو چارو وزارت د افغانستان په راتلونکو ولسمشریزو ټاکنو کې له یو ځانګړي نوماند څخه د مسکو د ملاتړ په اړه خپاره شوي راپورونه رد کړي او هغه یې «اوازه» وبلل.
دغه وزارت ویلي چې، تر دې مخکې داسې راپورونه خپاره شوي، چې ګواکې روسیه د افغانستان په راتلونکو ولسمشریزو ټاکنو کې له کوم ځانګړي نوماند څخه ملاتړ او «مالي» مرسته ورسره کوي.
په دغه اعلامیه کې راغلي:"په ټینګار سره وایو، چې روسیه د افغانستان په راتلونکو ولسمشریزو ټاکنو کې له هېڅ یو کاندید څخه ملاتړ نه کوي، ځکه دا د افغانستان یوه داخلي موضوع ده."
«It can be stated with certainty that Russia has not and will not support any candidates in the upcoming presidential election in Afghanistan, as it is a purely domestic affair» https://t.co/cY7JePaRXI pic.twitter.com/c6FncNIrTi
— RusEmbassy-Kabul (@RusEmbassyKabul) August 16, 2019
د روسیې د بهرنیو چارو وزارت همدارنګه زیاته کړې، چې په افغانستان کې روان وضعیت له نژدې څاري او وايي، تمه ښيي چې ټول بهیرونه په افغانستان کې تلپاتې سولې ته د رسېدو لامل شي.
ټاکل شوې د افغانستان ولسمشریزې ټاکنې د روان ۱۳۹۸کال د مېزان میاشتې پر شپږمه نېټه تر سره شي.
دغه ټاکنو ته د ملي یووالي حکومت د مشرانو په ګډون اتلسو تنو ځانونه کاندید کړي و، چې له ډلې یو کاندید زلمی رسول د محمد اشرف له دولت جوړونکي ټېم سره یو ځای شو.
تر دې مخکې د افغانستان د ټاکنو خپلواک کمېسیون له ټولو کاندیدانو څخه غوښتي و چې د انتخاباتي کمپاین پر مهال له بهرنیو مرستو له تر لاسه کولو څخه ډډه وکړي.