د امریکا د بهرنیو چارو وزیر مایک پمپیو د ننګرهار په هسکه مېنه ولسوالۍ کې د تېرې جمعې ورځې تر چاودنې وروسته ویلي، چې هېواد یې په افغانستان کې سولې او ثبات ته ژمن دی او د تروریزم په وړاندې مبارزې ته به دوام ورکوي.
پرون شنبه د اکتور پر ۱۹مه «تلې۲۷مه» د امریکا د بهرنیو چارو وزارت لخوا په خپره شوې اعلامیه کې د ښاغلي پمپیو له قوله ویل شوي، چې امریکا به د سوله غوښتونکو افغانانو ترڅنګ ولاړه وي.
په یاد بیان کې د نوموړي له قوله راغلي: "امریکا په افغانستان کې سولې او ثبات ته ژمنه ده او د تروریزم په وړاندې زموږ مبارزه به دوام ولري، موږ به یوازې د هغو افغانانو چې سوله او خپل هېواد په راتلوونکي کې له هر ډول تاوتریخوالې څخه پاک غواړي، ترڅنګ ولاړ یو."
ښاغلي پمپیو د ننګرهار ولایت د هسکې مېنې ولسوالۍ په یو جومات کې د تېرې جمعې ورځې چاودنه هم غندلې او زیاته کړې ده، چې عبادت ځایونه باید له هر ډول بریدونو څخه خوندي وي.
ښاغلي پمپیو ویلي: "د عبادت ځایونه باید خوندي وي،باید د تروریستي حملو هدف ونه ګرځول شي، زه د دغه پېښې له قربانیانو سره ژوره خواخوږي څرګندوم."
We condemn in the strongest terms yesterday’s attack on worshipers at a mosque in Nangarhar, Afghanistan. Places of worship should be sanctuaries, not targets for terrorist attacks. We extend our heartfelt condolences to the victims and their families.
— Secretary Pompeo (@SecPompeo) October 19, 2019
دغه برید چې تر دامهاله یې هېڅ یوې وسله والې ډلې مسؤلیت نه دی اخیستی، په کور دننه او بهر په پراخه کچه وغندل شو.
د ننګرهار د چارواکو په وینا په یاد برید کې ۷۰ تنه لمونځ کوونکي وژل شوي او ۳۲ نور ټپیان شوي دي.
ولسمشر محمد اشرف غني هم نن هسکې مېنې ولسوالۍ ته د سفر پرمهال وویل، چې د دغه برید عاملینو ته به سخته سزا ورکړي.
هغه همدارنګه ولایتي ادارې ته سپارښتنه وکړه، چې د شینوارو له سیمو د داعش، طالبانو او نورو تروریستانو ريښې وباسي.