د سره صلیب نړیوال سازمان وايي، په افغانستان کې د ماین چاودنو له امله د مرګ ژوبلې کچې زیاته شوې ده.
د سره صلیب سازمان د پنجشنبې په ورځ اکتوبر ۱۳ ( تلې ۲۲) پر خپل ټویټر پاڼه لیکلي: "د روان کال د جنورۍ او جون میاشتې تر منځ په افغانستان کې د چاودېدنکو توکو ۳۹۲ پېښې ثبت شوي دي چې له امله یې ۹۰۲ کسانو ته مرګ ژوبله اوښتې ده."
د سره صلیب نړیوال سازمان د اندېښنې په ښودلو سره ویلي چې د ماین چاودنو ۸۵سلنه قربانیان ملکیان دي او ۴۰ فسصده یې ماشومان دي.
دې سازمان ویلي دي چې مایونونه او چاودېدونکي توکي د افغانانو لپاره لاهم جدي ګواښ دی.
Mines and explosive ordnance in #Afghanistan pose a serious threat to the people. Since January, we are seeing an increase in injuries & deaths caused by these weapons. Most of the victims are children. Clearing these weapons is essential to keep everyone safe. pic.twitter.com/C9A8N55ot5
— ICRC Afghanistan (@ICRC_af) October 13, 2022
د سره صلیب نړیوال سازمان د خلکو د ژوند ژغورلو په هدف په افغانستان کې د ټولو ماینونو پر پاکولو باندې ټینګار کړی دی.
دا په داسې حال کې ده چې دروان میلادي کال په سپټمبر او جولای میاشتو کې په هلمند او زابل ولایتونو کې د ناچاوده توکو د چاودنې له امله د ۱۱ افغان ماشومانو د وژل کېدو او ۱۴ نورو د ټپي کېدو راپورونه ورکړل شوي و.
تر دې مخکې د ملګرو ملتونو د ماشومانو د ملاتړ صندوق یا (یونیسف) هم په افغانستان کې له جګړو څخه د پاتې شویو ناچاودو توکو چاودنو له امله د ماشومانو د مرګ ژوبلې په اړه اندېښنه څرګنده کړې وه.
یاد بنسټ د اپرېل دوهمه (وري ۱۳) په یوې اعلامیې کې ویلي و چې په تیرو اوو میاشتو کې په افغانستان کې د پاتې شوو نا چاوده توکو د چاودنې له امله ۳۰۱ ماشومانو ته مرګ ژوبله اوښتې ده.
تر دې مخکې ملګرو ملتونو ویلي وو چې په ۲۰۲۰ میلادي کال کې په نړۍ کې د ناچاوده مهاتو د چاودنو له کبله ۳۹۰۰ ماشومانو خپل ژوند له لاسه ورکړی دی.
دغه سازمان همدارنګه ویلي چې د ۲۰۲۱ میلادي په لومړیو شپږ میاشتو کې په افغانستان کې څه باندې ۴۶۰ماشومان د تاوتریخوالي په ځانګړي ډول د ناچاوده مهماتو د چاودنو له امله وژل شوي دي.