د افغانستان د عامې روغتیا وزیر ډاکټر احمد جواد عثماني وايي، په دغه هیواد کې د کرونا ویروس رسمي پېښې شپږ سلنې ټيټې شوي، خو وايي، بیا هم د کرونا ویروس د دوهمې څپې راتلو ګواښ شته.
نوموړي نن دوشنبه اکتوبر۵(تلې۱۴) په کابل کې خبریالانو ته وویل چې د تیرې اونۍ تر وروستیو پورې د کرونا ویروس له امله د مړو شوو کسانو فیصدي اووه سلنې ته ټيټه شوې وه.
له هغه څخه یوه اونۍ وړاندې د کرونا ویروس له امله د مړو شوو کسانو فیصدي ۱۶ سلنه وه.
د روغتیا د وزیر د معلوماتو په اساس تیره اونۍ د کرونا ویروس څخه ۳۰۰ تنه بیرته روغ شوي و، خو تر هغه وړاندې اونۍ کې شااوخوا ۱۰۰ تنه بیرته روغ شوي و.
د نوموړي په خبره تر تیرې اونۍ پورې په افغانستان کې د کرونا ویروس مثبتو پېښو فیصدي شپږ سلنه وه:"په داسې حال کې موږ په ښه وضعیت کې یو، خو باید هیر نه کړو چې کرونا تر اوسه ختمه شوې نه ده،موږ اړتیا لرو چې د کرونا له دوهمې څپې څخه باید د روغتیايي لار ښوونو په عملي کولو سره ځان وساتو."
تیرو ۲۴ ساعتونو کې مثبتې پېښې
د افغانستان د عامې روغتیا وزارت د معلوماتو په اساس په تیرو ۲۴ ساعتونو کې په دغه هیواد کې د کرونا ویروس ۸۱ مثبتې پېښې ثبت شوي او څلور تنه نور مړه شوي دي.
روغتیا وزارت نن دوشنبه اکتوبر۵(تلې۱۴) ویلي چې په تیر یوه شپه او ورځ کې د کرونا ویروس د ۳۴۱ مشکوکو سمپلونو معاینات شوي چې ۸۱ مثبت ثابت شوي دي.
په دې سره په افغانستان کې د کرونا ویروس د ټولو مثبتو پېښو شمېر ۳۹۴۲۲ ته پورته شوو.
همدارنګه په تیرو ۲۴ ساعتونو کې د څلورو تنو په مړه کېدو سره د کرونا ویروس له امله د ټولو مړو شوو کسانو شمېر ۱۴۶۶ تنو ته ورسېد.
کرونا ویروس د لومړي ځل لپاره د ۲۰۱۹ کال په ډسمبر میاشت کې د چین د هوبي ایالت په ووهان ښار کې پیدا او وروسته نورې نړۍ ته هم خپور شو.
د امریکا د جانس هپګینز پوهنتون د معلوماتو په اساس تر دا مهاله په نړۍ کې څه باندې ۳۵ میلیونه کسان په کرونا ویروس اخته شوي او څه باندې یوملیون نور ورڅخه مړه شوي دي.