د لبنان د عامې روغتیا وزارت چهارشنبې سپتمبر ۱۸ (وږي ۲۸) وویل چې په دغه هېواد کې د مخابراتي وسیلو په تازه چاودنو کې لږ ۲۰ کسان وژل شوي او تر ۴۵۰ زیات ټپیان شوي دي.
له دې یوه ورځ وړاندې په لبنان کې د حزب الله ډلې له خوا د استعمالېدونکو مخابراتي وسیلو په مرموزو چاودنو کې ۱۲ تنه ووژل شول او لږ تر لږه ۲۸۰۰ نور ټپیان شول.
د ایران له ملاتړه برخمنې حزب الله ډلې د سه شنبې په ورځ د چاودنو د لومړۍ څپې پړه پر اسرائیل اچولې او د غچ اخیستلو خبرداری یې ورکړی دی چې له کبله یې په سیمه کې د پراخې جګړې د پیل کېدو وېره رامنځته شوې ده.
دا مطلب هم ولولئ لبنان کې د مخابرو مرموزو چاودنو د ایران سفیر او زرګونه کسان ژوبل کړيد لبنان د عامې روغتیا وزارت په یوه اعلامیه کې وویل: "د مخابرو د چاودنو نوې څپې نهه کسان ووژل او تر ۳۰۰ ډېر یې ټپیان کړل."
حزب الله ته نږدې یوې سرچینې ویلي ددغې ډلې د غړو مخابرې نن په پلازمینه بیروت کې د هغو کسانو په جنازه کې چاودلي دي چې د سه شنبې په چاودنو کې وژل شوي وو.
سرچینې ویلي چې دغه تازه پیښې د بیروت په جنوبي څنډه کې رامنځته شوي دي. د حزب الله سره تړلیو د ژغورنې کارکوونکو تائید کړې ده چې تازه چاودنې په همدې سیمه کې په دوو موټرو کې رامنځته شوي دي.
د جنازې مراسمو ته ورغلیو خبریالانو ویلي چې تازه چاودنو په خلکو کې وېره خپرې کړې ده.
د لبنان ملي خبري اژانس ددغه هېواد په ختیځ او جنوب کې د حزب الله تر ولکې لاندې نورو سیمو کې هم د مخابراتي وسیلو د چاودلو خبر ورکړی دی.
په دغو سیمو کې موجودو د فرانس پرس اژانس خبریالانو ویلي چې د چاودنو غږونه یې اورېدلي دي.
په ختیځ بالبک ښار کې د یو روغتون چارواکو فرانس پرس ته ویلي چې د مخابرو په چاودنو کې ۲۵ تنه ژوبل شوي دي.