د نجونو د تعليم نړيوالې مبارزې او د سولې نوبل جایزې ګټونکې ملالې يوسفزۍ د بريتانيې له نوي صدراعظم غوښتنه کړې چې د افغان نجونو حقونو او تعليم ته دې لومړيتوب ورکړي.
نوموړې د جولای اتم (د چنګاښ پر ۱۸) پر خپله اېکس پاڼه په خپور شوي بيان کې کییر سټارمر ته د صدراعظمۍ مبارکي ورکړې او ويلي يې دي چې د نړۍ په هر کونج کې نجونې د هغه پر مشرتابه حساب کوي.
يوسفزۍ زياته کړې ده. "لکه څنګه چې تاسو په راتلونکو ۱۰۰ ورځو کې د انګلستان د بهرنۍ تګلارې او پراختیا اجنډا ټاکئ، نو دا مهمه ده چې تاسو په ټوله نړۍ کې د نجونو حقونو او تعلیم ته لومړیتوب ورکړئ، په ځانګړې توګه په افغانستان کې هغو نجونو ته پاملرنه وکړئ چې د طالبانو تر جنسي اپارتايد رژیم لاندې ښوونځيو ته له تګه منع کړل شوي دي."
Congratulations to @Keir_Starmer, @davidlammy and @anneliesedodds on your new leadership roles in the UK government 🇬🇧 As you set the UK’s foreign policy and development agendas over the next 100 days, it is critical that you prioritise girls’ rights and education around the…
— Malala Yousafzai (@Malala) July 8, 2024
سټارمر د جولای پر پینځم (چنګاښ ۱۵) د انتخاباتو تر ګټلو وروسته د بریتانيې صدراعظم په توګه وټاکل شو. نوموړي د ملالې يوسفزۍ د غوښتنې په اړه تر اوسه غبرګون نه دی څرګند کړی خو د انتخاباتي کمپاينونو پر مهال يې ويلي وو چې هېواد به یې په نړۍ کې د بشري حقونو د اوضاع سمولو لپاره خپل رول ترسره کوي.
دا په داسې حال کې ده چې طالبانو د ۲۰۲۱کال د اګست پر ۱۵ پر افغانستان له واکمنېدو وروسته په ټول دغه هیواد کې سختدريځې تګلارې عملي کړي چې عمده يې پر ښځو د کار کولو محدوديتونه او له شپږم ټولګي پورته د نجونو پر زدکړو بندیزونه دي.
د طالبانو حکومت په دې اړه د نړيوالو غوښتنې له پامه غورځولي او دا عمل يې د افغانستان داخلي چاره بللې ده چې په وينا يې د وخت په تېرېدو سره به يو مناسب چوکاټ ورته برابر کړي.
د افغانستان په اړه د دوحې په درېيمه غونډه کې هم د طالبانو د پلاوي مشر ذبیح الله مجاهد د نجونو تعلیم د افغانستان داخلي مسله بللې وه.
ملګرو ملتونو د مجاهد څرګندونو ته په غبرګون کې ویلي وو چې د نجونو تعلیم د افغانستان کورنۍ مسله نه ده بلکې دا هېواد په دې برخه کې نړیوال مسوولیتونه لري.
د ملګرو ملتونو د سرمنشي مرستیالې روزمري دي کارلو د جولای پر دويم (د چنګاښ پر ۱۲) په دوحه کې له افغان مدني فعالانو سره تر ناستې وروسته يوې خبري غونډې ته وويل "کله چې د یوې ټولنې نیمايي برخه له کار او فعالیته محرومه وي، طبیعي ده چې اقتصاد وروسته پاتې کېږي او هره برخه به نیمګړې وي."