د افغانستان د جمهوري ریاست د لومړي مرستیال امرالله صالح پر موټریز کاروان باندې برید په ملي او نړیواله کچه غبرګونونه زیږولي دي.
د افغانستان جمهور رئیس محمداشرف غني په یوه اعلامیه کې پر خپل مرستیال باندې نننی برید غندلی او ویلي یې دي چې ترهګر او د هغوی بهرني ملاتړي د داسې "جنایتونو" په کولو سره سوله، جمهوریت او د افغانستان راتلونکې نشي کمزوري کولی.
ښاغلي غني ټینګار کړی چې د ترهګرو پر وړاندې به د افغان پوځیانو جدي او پریکنده مبارزه دوام ولري.
د جمهور رئیس دوهم مرستیال سرور دانش ویلي دي: "پداسې حال کې چې ټول د دولت او طالبانو ترمنځ د سولې خبرو پیل ته انتظار یو، د جمهوري ریاست پر لومړي مرستیال باندې برید د سولې د پروګرام څرګنده نقض کول دي."
د افغانستان د ملي مصالحې د عالي شورا مشر عبدالله عبدالله بیا وایي چې د جمهوري ریاست پر لومړي مرستیال چاودنه ښيي چې پټ او ښکاره دښمنان نه غواړي افغانستان سولې ته ورسیږي.
ښاغلي عبدالله زیاته کړې: "د جمهوري ریاست پر لومړي مرستیال برید په داسې حال کې چې موږ سولې ته نژدې شوي یو او د افغانستان دخلکو روښانه پیغام سوله، د جګړې او وینې بهېدلو ختمول دي، دا ښيي چې د سولې پټ او ښکاره دښمنان نه غواړي چې د جنایتونو کړۍ وشکیږي او افغانستان سولې او ثبات ته ورسیږي."
نن چهارشنبه په کابل ښار کې د جمهوري ریاست د لومړي مرستیال امرالله صالح پر موټریز کاروان چاودنه کې د کورنیو چارو وزارت په وینا ۱۰ ملکي وګړي وژل شوي او د ښاغلي صالح د امنیتي ساتونکو په ګډون ۱۵تنه ټپیان شوي دي.
د افغانمستان د مذاکره کوونکي پلاوي رئیس معصوم ستانکزي هم دغه برید سخت غندلی او ویلي یې دي چې د سولې بهیر "د تاوتریخوالیو ژر تر ژره ختمیدو ته اړتیا لري".
نړیوال غبرګونونه
په کابل کې د امریکا د سفارت شارژدافیر راس ویلسن ویلي چې پر امرالله صالح باندې ننني برید اندیښمن کړی دی. هغه ټینګار کړی چې: "د امریکا متحده ایالات د افغانستان د بنسټونو او دموکراتیکو مشرانو او ددې جملې څخه د جمهور رئیس له مرستیال صالح څخه جدي ملاتړ کوي او مونږ په جدي توګه د هغو هڅو ملاتړ کوو چې هیله من یو ژر په دوحه کې د دوامداره سولې او دا ډول تاوتریخوالیو د پای ته رسیدو لپاره پیل شي".
(1/2) I am shocked & dismayed by today%27s attack on First Vice President @AmrullahSaleh2%27s life. The United States strongly supports Afghanistan’s democratic institutions and leaders, including, Vice President Saleh...
— Chargé d’Affaires Ross Wilson (@USAmbKabul) September 9, 2020
په افغانستان کې د اروپايي ټولنې، ناټو او ګڼو نورو چارواکو هم د جمهوري ریاست پر لومړي مرستیال امرالله صالح چاودنه غندلې ده.
په افغانستان کې اروپايي ټولنې یاده چاودنه پر جمهوریت برید بللی او د هغو کسانو وېرونکی عمل یې بللی چې غواړي د سولې هڅې زیانمنې کړي.
Strongly condemn the cowardly attack against the First Vice President @AmrullahSaleh2. We are glad that he remains unharmed. This is an attack on the Republic, & desperate act by spoilers of peace efforts, who must be collectively confronted. Condolences to the affected families.
— EUinAfghanistan (@EUinAfghanistan) September 9, 2020
په افغانستان کې د ناټو ماموریت هم پر ښاغلي امرالله صالح برید غندلی او هغه یې د سولې د دښمنانو کار بللی دی.
ناټو ویلي چې د افغانستان دښمانان د تاوتریخوالي کمېدو او سولې خبرو پیلېدو په اړه چې د افغانانو غوښتنه ده سترګې پټوي.
"I strongly condemn #Kabul attack targeting @AmrullahSaleh2, killing & injuring many civilians. Enemies of peace continue to ignore the will of the Afghan people to stop violence & start intra-Afghan negotiations. #NATO stands with ANDSF for a secure #Afghanistan"- @pontecorvoste
— NATO in Afghanistan (@NATOscr) September 9, 2020
پاکستان هم دغه برید غندلی دی.
طالبانو ویلي دغه برید دوی نه دی کړی او بلې کومې ډلې هم تر اوسه ددې برید مسؤلیت نه دی منلی.