د افغانستان لپاره د امریکا شارژدافیر راس ویلسن د افغانستان په مشرانو غږ کړی دی چې نوی حکومت دې ژر جوړ او بین الافغاني مذاکرات پیل کړي.
ښاغلي ویلسن د یکشنبې په ورځ جولاۍ ۱۹ (چنګاښ ۲۹) په خپل ټویټر کې ولیکل: "موږ د دغه هېواد په مشرانو ټېنګار کوو چې نوی حکومت او د بیا پخلاینې عالي ملي شورا دې ژر جوړ کړي، د بندیانو تبادله دې بشپړه کړي او بین الافغاني مذاکرات دې پیل کړي. "
دا په دې وروستیو کې لومړی ځل دی چې د امریکا شارژدافیر د افغان حکومت له مشرانو څخه داسې ښکاره غوښتنې کوي.
هغه په خپل ټویټر کې لیکلي دي چې د افغانانو حوصله ختمه شوې ده او "بین الافغاني مذاکرات پیل کړئ چې په دایمي او هر اړخیز اوربند باندې بحثونه پیل شي."
We urge this country’s leaders promptly to establish the new government, create the High Council for National Reconciliation, complete the exchange of prisoners, and move to the opening of intra-Afghan negotiations.
— Chargé d’Affaires Ross Wilson (@USAmbKabul) July 19, 2020
نوموړي د افغانستان د مخکني ولسمشر حامد کرزي او پخواني جهادي مشر عبدالرب رسول سیاف سره هم خبرې کړي دي.
وايي دوی دواړو د مۍ په ۱۷ نېټه د ولسمشر غني او پخواني اجرايي رئيس عبدالله عبدالله ترمنځ د سیاسي شخړې په حل کې مهم رول ولوبوه. له هغې نېټې راهېسې د افغانستان اکثریت وزارتونه کابینه نلري او حکومت نیمګړی دی.
ښاغلی ویلسن داسې مهال د بین الافغاني مذاکراتو په پيل کېدو او بندیانو په تبادلې ټېنګار کوي چې افغان چارواکي وايي د طالب زندانیانو هغه بندیان نه خوشې کوي چې «حق العبدي» مسایل لري.
تیره اونۍ د افغانستان د بهرنیو چارو وزارت سرپرست محمد حنیف اتمر وویل چې دغه ۶۰۰طالب بندیان جدي ستونزې لري او خوشې کول یې د ملي او نړیوالو قوانینو په خلاف دي.
ښاغلي اتمر دا هم وویل چې افغان حکومت د سولې د مذاکراتو د پیل لپاره څو ځلې نیټې ټاکلي چې په خبره یې طالبانو رد کړي دي. طالبان ټېنګار کوي چې تر بین الافغاني خبرو مخکې یې باید ټول ۵۰۰۰ بندیان خوشې شي.
د بندیانو خوشې کول د فبرورۍ په ۲۹ نېټه د امریکا-طالبانو ترمنځ د سولې د تړون مهمه برخه و. افغان حکومت وايي تر دې دمه یې څه باندې ۴۰۰۰ طالبان او طالبان وایيچې سلګونه افغان سرتېري یې خوشي کړي دي.