سعودي عربستان وايي، د افغان حکومت او طالبانو د پخلاینې پروسې چې د تاوتریخوالي کمېدو لامل کیږي ملاتړ کوي.
د سعودي عربستان د بهرنیو چارو وزارت پرون دوشنبه سپټمبر ۲۱ (وږې ۳۱) ناوخته پر خپل ټویټرپاڼه په خپره کړې اعلامیه کې ویلي چې د افغان حکومت او طالبانو ترمنځ د پخلاینې وروستی بهیر څاري.
د سعودي عربستان په اعلامیه کې راغلي: "سعودي عربستان د افغان حکومت او طالبانو ترمنځ د پخلاینې وروستۍ خبرې تعقیبوي او د پخلاینې له پروسې او هر هغه څه چې په افغانستان کې د امنیت، ثبات او تاوتریخوالي د کمولو لامل کیږي، ملاتړ کوي."
#بيان | تابعت حكومة المملكة المصالحة التي عُقدت مؤخرًا بين حكومة أفغانستان وحركة طالبان، وتعرب عن دعمها لعملية المصالحة وكل ما من شأنه تحقيق الأمن والاستقرار والحد من العنف في أفغانستان، وأن المملكة كانت ومازالت مع أفغانستان والشعب الأفغاني لتحقيق جميع آماله وتطلعاته.
— وزارة الخارجية 🇸🇦 (@KSAMOFA) September 21, 2020
په اعلامیه کې ویل شوي چې سعودي عربستان تر هغه د افغانانو ترڅنګ ولاړ دی، تر څو ټولې ریښتینې هیلې او غوښتنې پوره شي.
د افغانستان د اسلامي جمهوریت او طالبانو د مذاکراتي ټېمونو ترمنځ د سولې بین الافغاني خبرې د تیرې اونۍ د شنبې په ورځ په قطر کې پرانیستل شوې.
د امریکا د متحده ایالاتو، امنیت شورا، اروپايي ټولنې، ناټو، د اسلامي هیوادونو د همکاریو سازمان او ګڼو هیوادونو یې هر کلی وکړ.
د دغو خبرو هدف په افغانستان کې د روانې جګړې ختمولو ته د لارې موندل دي.
تر دا مهاله د دواړو لورو مذاکراتي ټېمونو د تماس ډلې څو ځله خپلو کې سره د سولې مذکراتو د کاري طرزالعمل په اړه بحثونه کړي دي.
د افغانستان د اسلامي جمهوریت د مذاکراتي ټېم ویاند او غړي نادر نادري ویلي چې د وړمې ورځې بحثونو کې د سولې مذاکراتو د کاري طرزالعمل په اړه پرمختګ شوی دی.
ولسمشر غني تیره ورځ د سولې نړیوالې ورځې په مناسبت وینا کې هم وویل چې په مذاکره کې باید مداخله ونشي او له مذاکره کوونکي پلاوي څخه پر ملاتړ یې ټینګار وکړ.