د جنوبي کوریا ولسمشر یون سوک یول د سه شنبې په ورځ ډسمبر درېیمه (لیندۍ۱۳) په دغه هېواد کې په داسې حال کې پوځي حکومت اعلان کړ او د «دولت ضد» ځواکونو د ځپلو ژمنه یې وکړه، چې د هغه مخالف قانون جوړوونکي د پارلمان کنترول په لاس کې لري.
نوموړي په خپلو تلویزوني خبرو کې وویل چې هڅه کوي د شمالي کوریا ملاتړي او د جنوبي کوریا ضد ځواکونه سره جلا کړي.
راپورونه وايي چې د پوځي حکومت له اعلان وروسته، ځانګړي سرتېري د پارلمان ودانۍ ته ورسېدل او د ننوتلو هڅه یې کوله. له دې لږه شېبه وروسته، د جنوبي کوریا پارلمان د پوځي حکومت د ړنګولو په اړه رایه ورکړه او له سرتېرو یې وغوښتل چې د پارلمان له ودانۍ څخه ووځي.
د جنوبي کوریا د اساسي قانون په اساس، پارلمان کولای شي د رایو په اکثریت سره پوځي حکومت ړنګ کړي.
د جنوبي کوریا رسمي اژانس یونهاپ راپور ورکړی دی، چې د پوځي حکومت له اعلان وروسته، د دغه هېواد پوځي مشرانو د پارلمان ټولې غونډې او نورې غونډې چې د خلکو اذهان ګډوډولای شي، وځنډولې.
د متحدو ایالتونو د بهرنیو چارو وزارت مرستیال کورت کمپبل د جنوبي کوریا وضعیت د «ډېرې اندېښنې» وړ وباله او په دغه هېواد کې یې د قانون په انتفاذ تاکيد وکړ. هغه وویل چې د امریکا ولسمشر جوبایډن ته یې د جنوبي کوریا د وضعیت په اړه راپور ورکړی دی.
کمپبل وویل: «هیله لرو چې هر ډلو سیاسي شخړه په سوله ایز ډول او د قانون په اساس حل شي. غواړم بیا ټېنګار وکړم، چې له جنوبي کوریا سره زموږ ایتلاف وسپنیز دی او په ګډوډ حالت کې به د جنوبي کوریا ترڅنګ درېږو.»
د جنوبي کوریا ولسمشر یون د امریکا متحد دی او تېرکال ولسمشر بایډن په سپینې ماڼۍ کې د هغه قدمونو ته سور فرش وغوړوه او ښه راغلاست یې ورته وویل.
د بریتانیا حکومت خپلو خلکو ته ویلي دي چې په جنوبي کوریا کې په سیاسي مظاهرو کې له ګډون او هغوی ته له نژدې کېدو څخه ډډه وکړي. د بریتانیا د بهرنیو چارو وزارت ویلي دي: «وضعیت چټک بدلېږي... په جنوبي کوریا کې پرمختګونه له نژدې څارو.»
له ۱۹۸۰ کال راهېسې دا لومړی ځل دی، چې په جنوبي کوریا کې پوځي حکومت اعلان کېږي.