په میدان وردګ ولایت کې د سویډن کمېټې بند ۴۲ روغتیايي مرکزونه نن جمعه بېرته د خلکو پر مخ پرانیستل شول.
یاد روغتیايي مرکزونه د تېرو پنځو ورځو راپدېخوا د طالبانو د ګواښ له امله د خلکو پرمخ تړل شوي و.
د افغانستان لپاره د سویډن کمېټې د پروګرامونو مسؤل ډاکټر خالد فهیم نن جمعه د «چنګاښ پر۲۸مه» امریکا غږ ته وویل، چې طالبانو بېرته د یادو روغتیايي مرکزونو د خلاصولو اجازه ورکړې ده.
هغه وویل:"موږ په میدان وردګ کې له سیمه ییز دفتر سره اړیکه نیولې ده،د هغوی د معلوماتو له مخې ورته ویل شوي چې کلینیکونه بېرته خلاص کړي، هغه کلینیکونه چې څلورویشت ساعته خدمات وړاندې کوي، هغوی ته موږ د همدغه معلوماتو پر اساس ویلي، چې نوکریوالان په کلینیکونو کې خپلو وظیفو ته حاضر شي."
د افغانستان د عامې روغتیا وزارت ویاند ډاکټر وحیدالله مایار هم پر خپل ټوېټر پاڼه د یادو روغتیايي مرکزونو د خلاصېدو خبر ورکړی دی:
Luckily, all the 42 health facilities that were closed in Maidan Wardak province, have resumed thier normal activites today. @FerozFerozuddin @cnni @euronews_pe @KhoshTaib @bbcworldservice @bsarwary @1TVNewsAF @TOLOnews @RuetersSA @UNICEF @WHOAfghanistan @AFP @TOLOnews @UNAMAnews
— Dr. Wahidullah Mayar (@WahidullahMayar) July 19, 2019
طالبانو روانه میاشت په دایمیرداد ولسوالۍ کې پر یو روغتیايي مرکز د افغان ځواکونو تر عملیاتو وروسته چې څلور روغتیايي کار کوونکي پکې ووژل شول د یادو روغتیايي مرکزونو د تړلو ګواښ وکړ.
د افغانستان لپاره د سوېډن کمېټې د پروګرامونو مسؤل امریکا غږ همدارنګه وویل، چې د دغه روغتیايي مرکزونو په تړل کېدو سره هره ورځ ۵۷۰۰ تنه له وړیا درملنې څخه بې برخې کېدل.
طالبانو هم په یوه اعلامیه کې یادو روغتیايي مرکزونو ته د بېرته فعالیت د اجازې خبر ورکړی دی.
د افغانستان لپاره د سویډن کمېټې مسؤلینو د جګړې پر ښکېلو اړخونو غږ وکړ چې د نړیوالو بشري قوانیونو او حقوقو له مخې د روغتیايي مرکزونو امنیت او خوندیتوب ته پام وکړي.