د جنوبي اسیا لپاره د امریکا د بهرنیو چارو وزارت ځانګړې استازې الیس ویلز وايي تمه لري، چې افغان ادارې د ولسمشریزو ټاکنو د خوندیتوب لکه د شکایتونو ارزول، د درغلیو مخنیوی او په شفاف ډول د پایلو د تنظیمولو په برخه کې اړین ګامونه پورته کړي.
د الیس ویلز دفتر پپه ټوېټر د هغې له قوله همدارنګه ویلي، چې یوازې د افغانستان د ټاکنو خپلواک کمېسیون د پایلو د اعلانولو صلاحیت لري او زیاته کړې ده چې نوماندان او د هغوی پلویان باید پر خپل سر وړاندوینې ونکړي.
میرمن ویلز وویل د افغانستان خلک په دې برخه کې د شفافیت او حساب ورکولو مستحق دي.
The only Afghan institution that can declare election results is the IEC. Candidates and their supporters should not prejudge the outcome of the election by speculating on partial returns. The Afghan people deserve transparency and accountability. AGW
— State_SCA (@State_SCA) October 1, 2019
تر دې مخکې د امریکا د بهرنیو چارو وزیر مایک پمپیو هم ویلي وو چې د افغانستان د ټاکنو کمېسیون باید د رایو شفافیت خوندي او شکایتونه وڅېړي.
د عبدالله عبدالله په مشرۍ د "ثبات او همپالنې" او محمد اشرف غني په مشرۍ د "دولت جوړونکي" ټېمونو په ټاکنو کې د بري ادعاوې کړي.
د افغانستان د ټاکنو کمېسیون تېره ورځ وویل، چې د دوی د معلوماتو له مخې په ټاکنو کې د هېواد په کچه تقریباً ۲میلیونه او ۵۶۰ زره کسانو ګډون کړی و.
د ټاکنو کمېسیون مسؤلینو نن چهارشنبه (اکتوبر ۲) په کابل کې خبریالانو ته وویل، چې له ټولو ولسوالیو څخه مواد د ولایتونو مرکزونو انتقال شوي دي، چې وروسته به د د دې موادو لیږل کابل ته پیل شي.
دغه مسؤلینو همدارنګه وویل، چې د کابل په ګډون د دوو ولایتونو ټاکنیز مواد د ټاکنو خپلواک کمېسیون مرکزي دفتر ته اتقال شوي دي.
د افغانستان د ټاکنو خپلواک کمېسیون کمېشنر مولانا عبدالله یو ځل بیا د ټاکنو کمېسیون دریځ تکرار کړ، چې له بایومیټریک پرته نورې رایې نه حسابیږي.
د ټاکنیزو شکایتونو کمېسیون هم تېره ورځ وویل، چې تر دا مهاله له ۲۶۰۰ زیات شکایتونه ثبت کړي، چې سر له نن چهارشنبې څخه یې ارزونه پيل شوې ده.
د ولسمشریزو ټاکنو څلورو ټېمونو ګلبدین حکمتیار، فرامرزتمنا او رحمت الله نبیل او عبدالله عبدالله ویلي، چې له بایومټریک پرته نورې رایې نه مني.