د متحده ایالاتو د بهرنیو چارو وزارت د جمعې په ورځ مارچ ۱۴ (کب ۲۴) د ارمنستان او اذربایجان ترمنځ د مذاکراتو د پای ته رسیدلو او د سولې د هوکړې هرکلی وکړ.
د امریکا د بهرنیو چارو وزارت ویلي چې دا تړون به نه یوازې د دواړو هېوادونو ترمنځ څو شخړې پای ته ورسوي، بلکې د دواړو هېوادونو د خلکو د هوساینې او د نړۍ د لا زیاتې سولې لامل به شي.
د امریکا د بهرنیو چارو وزارت د دواړو هېوادونو ترمنځ د سولې هوکړې ته په اشارې سره په یوه خپره کړې اعلامیه کې ویلي: "دا د دواړو هېوادونو لپاره یو فرصت دی چې د یوې سوله ییزې نړۍ لپاره د ولسمشر ټرمپ له لید سره سم د تېرو څو لسیزو د جګړو پاڼه واړوي. اوس د سولې د ژمنې وخت دی، دا د دې تړون د لاسلیک او تصویب او د جنوبي قفقاز د خلکو لپاره د هوساینې د نوي دور د پیل وخت دی."
د امریکا د بهرنیو چارو وزارت دغه اعلامیه یوه ورځ وروسته له هغه خپءه شوه چې د اذربایجان او ارمنستان مقاماتو وویل چې د لسیزو راهیسې د روان کړکېچ د حل لپاره یې خبرې اترې پای ته رسولي او دواړو لورو د سولې د احتمالي تړون پر متن موافقه کړې ده.
دا پداسې حال کې دي چې د ارمنستان ولسمشر په قره باغ باندې د ارمني بیلتون غوښتونکو له دریو لسیزو واکمنۍ وروسته په دغې سیمې باندې د اذربایجان حاکمیت ومنه.
ارمنستان تېرکال هغه څلور کلي هم بېرته اذربایجان ته وسپارل چې یوه لسیزه مخکې یې په جګړې کې نیولي وو. د اذربایجان له لوري د قره باغ له نیول کېدو وروسته، د دغې سیمې تقریبآ ۱۰۰زره اوسېدونکي، چې ټول ارمنیان دي، وتښتېدل.
دا سیمه په ۱۹۹۴ کې په جګړې کې له اذربایجان څخه جلا شوه، خو یوې غاړې هم د یو خپلواک جمهوریت په توګه په رسمیت نه وه پېژندلې. د ترکیې حکومت په اذربایجان کې د ترکي نژاد خلکو ننګه کوي او روسیه بیا د ارمنستان کلکه ملاتړې ده او په دغه هېواد کې پوځي اډه لري.
په ۲۰۲۰ کې د دواړو خواو ترمنځ شپږ اونۍ جګړه وشوه چې په کې د دواړو هېوادونو شاوخوا ۶۵۰۰ امنیتي سرتېري ووژل شول. د مسکو په منځګړتوب او په سیمې کې د ۲۰۰۰ سوله ساتو ځواکونو له ځای په ځای کېدو وروسته، دا جګړه ختمه شوه.
