د امریکا ولسمشر ډونالډ ټرمپ ویلي دي چې د روسیې د ولسمشر ولادیمیر پوتین سره یې په ټلیفون ډیرې گټوري او اوږدی خبرې کړي دي.
د سپینې ماڼۍ ویاندې سارا ساندرز خبریالانو ته وویل چې دواړو جمهورو رئیسانو د امریکا، روسیې او چین ترمنځ د یوې نوي څو اړخیزې اټومي موافقې او یا د امریکا او روسیې ترمنځ د موجودې ستراتیژیکې اټومي موافقې د اوږدولو د امکان په هکله هم خبرې کړې دي.
میرمن ساندرز وویل چې د دواړو مشرانو خبرې څه دپاسه یو ساعت دوام وکړ او په مختصره توگه یې د امریکا د ٢٠١٦ کال انتخاباتو کې د روسیې د مداخلې په هکله د رابرټ مولر په پلټنو هم خبرې وکړې.
د سپینې ماڼۍ ویاندې همداشان وویل چې دواړو مشرانو د شمالي کوریا، اوکراین او ونزویلا په اړه هم خبرې وکړې. ښاغلي ټرمپ په خپل ټویټر هم دې موضوع ته اشاره کړې ده.
....We discussed Trade, Venezuela, Ukraine, North Korea, Nuclear Arms Control and even the “Russian Hoax.” Very productive talk!
— Donald J. Trump (@realDonaldTrump) May 3, 2019
میرمن ساندرز دا هم وویل چې په عمومي توگه دغه خبرې مثبتې وې.