د متحدو ایالتونو د باندنیو چارو وزیر وايي هیواد یې د افغانستان د هوساینې، خپلواکۍ او حاکمیت پیاوړي کول غواړي.
مايک پامپيو پر خپل ټويټر ویلي چې امريکا نه پرېږدي افغانستان د نړيوال ترورېزم په ځاله بدل شي او له افغانستان څخه د امريکايي ځواکونو د ايستلو په اړه هم واشنګټن جدي اراده لري.
پامپیو ویلي:"امریکا د سولې د هڅو په تعقیب افغانستان د نړیوالو ترورستي ډلو په ځاله د بدلېدو د مخنیوي او خپل وطن ته د عسکرو ستنولو په برخه کې جدي ده. امریکا له افغان حکومت او ټولو هغو اړخونو چې په دې برخه کې لېوالتیا لري د افغانستان د ځمکنۍ بشپړتیا خپلواکۍ او هوساینې لپاره کار کوي."
The U.S. is serious about pursuing peace, preventing #Afghanistan from continuing to be a space for international terrorism & bringing forces home. Working with the Afghan gov’t & all interested parties, the U.S. seeks to strengthen Afghan sovereignty, independence & prosperity.
— Secretary Pompeo (@SecPompeo) January 26, 2019
دا په داسې حال کې ده چې د افغان سولې لپاره د امریکا ځانګړي استازي په دوحه کې د طالب استازو سره پر تېرو شپږ ورځنیو خبرو خوښي ښودلې او ویلي یې دي چې د "مهمو مسایلو په اړه د پام وړ پرمختګ" شوی دی.
زلمي خلیلزاد تېره ورځ ویلي چې د افغانستان د سولې په هکله هر ډول وروستۍ پرېکړه "بین الافغاني خبرو" ته اړتیا لري.
ښاغلي خلیلزاد په خپل ټویټر لیکلي دي"مونږ د رامنځته شوي بهیر نه په استفادې خپلو خبرو ته دوام ورکوو. اوس هم یو شمیر مسایل پاته دي چې باید پرې کار وشي، تر هغه چې پر ټولو شیانو هوکړه ونشي پر هیڅ شي هوکړه نه کیږي. ټولو شیانو کې بینالافغاني خبرې او هر اړخیز اوربند هم راځي."
زلمي خلیلزاد په قطر کې تر شپږ ورځنیو خبرو وروسته تېره ورځ کابل ته راغلی او ټاکل شوې د تېرو غونډو جزئیات د ملي یووالي حکومت له مشرانو سره شریک کړي.
2/3. Will build on the momentum and resume talks shortly. We have a number of issues left to work out. Nothing is agreed until everything is agreed, and “everything” must include an intra-Afghan dialogue and comprehensive ceasefire.
— U.S. Special Representative Zalmay Khalilzad (@US4AfghanPeace) January 26, 2019
د طالبانو ویاند ذبیح الله مجاهد هم تېره شپه په یوه اعلامیه کې لیکلي چې د شنبې په مازدیګر د قطر په غونډه کې له افغانستان څخه د بهرنیو ځواکونو د وتلو په ګډون پر مهمو موضوعاتو بحث او مذاکرې شوي دي.
افغان حکومت تر دامهاله د امریکايي پلاوي او طالب استازو ترمنځ په پیل شوو خبرو کې مستقیم ګډون نه دی کړی، خو مخکې په وار وار ویلي چې د افغانستان د سولې په هکله هره پرېکړه باید د دې هېواد د حکومت له لارې وشي او د سیمې هېوادونه په کې دخیل وي.