د امریکا، افغانستان، هند او فرانسې مشرانو او ځینو نورو سیاستوالو په کرونا ویروس د برتانیا د اخته صدراعظم بوریس جانسن د ژر ښه کېدو هیله کړې ده.
ښاغلی جانس شاوخوا دوې اونۍ په کور کې قرنطین و چې تېره ورځ اپریل شپږمه (وري۱۸) په بېړنۍ څانګې کې بستر شو.
ولسمشر غني د سه شنبې په ورځ په خپل ټویټر کې لیکلي دي: "صدراعظم بوریس جانسن ته عاجله شفا غواړم. هغه ته دوعاوې کوو اوهیله لرو چې ژر یې روغ رمټ ووینو. موږ ټول د خپلو خلکو او صحي کارکوونکو سره په ګډه دغه ګډ ګواښ ته ماتې ورکولی شي."
I wish PM @BorisJohnson speedy recovery in the fight against #COVID19. He remains in our prayers and we hope to see him in good health soon. Together with help from our citizens and health workers, we can defeat this common menace.
— Ashraf Ghani (@ashrafghani) April 7, 2020
د امریکا د متحدو ایالتونو ولسمشر دونالډ ټرمپ هم د ښاغلي جانسن د روغتیا لپاره دوعا کړې او ویلي دي چې د هغه له ډاکټرانو سره په تماس کې دی.
ښاغلي ټرمپ د امریکا له دوو طبي پرمختللیو شرکتونو څخه غوښتې چې د لندن له چارواکو سره په تماس کې شي او د ځینو روغتیايي مرسته کوونکو درملو په اړه ورسره خپل معلومات او تجربې شریک کاندي.
د هند صدراعظم نریندرا مودي هم په خپل ټویټر کې هیله څرګنده کړې ده چې ښاغلی جانسن ژر تر ژره ورغیږي.
Hang in there, Prime Minister @BorisJohnson! Hope to see you out of hospital and in perfect health very soon.
— Narendra Modi (@narendramodi) April 6, 2020
د فرانسې ولسمشر امانویل مکرون هم د برتانیا د صدراعظم د ژر تر ژره ښه کېدو هیله کړې. هغه د ښاغلي جانسن د کورنۍ، برتیانیا د حکومت او خلکو سره خپل بشپړ حمایت اعلان کړی دی.
د برتانیا پخواني صدراعظم دیویدکامرون هم ویلي دي چې د ښاغلي جانسن په اړه فکر کوي. د برتانیا د مخالف ګوند مشر کیر استارمر په خپل ټویټر کې لیکليدي بېړنۍ څانګې ته د ښاغلي جانسن په انتقال خواشینی دی.
د برتانیا د حکومت ویاند ویلي دي چې د صدراعظم حالت د دوشنبې په غرمه نور هم خراب شو او ډاکټرانو سپارښتنه کړې ده چې هغه دې په بېړنۍ څانګه کې دې تر مراقبت لاندې وساتل شي.