په پېښور کې د " ښکلو هنرونو" یو روزنیز مرکز د ښوونځيو د رخصتیو پر مهال، ماشومانو ته د انځورګرۍ، موسیقۍ، نکلونو ویلو او فټنس په ګډون د هنري فعالیتونو په بېلابېلو برخو د فعالیت زمینه هواره کړې ده. پدغه ویډیو کې چې شاهین اپریدي رالیږلې، ددغه روزنیز مرکز ورځنی فعالیت انځور شوی دی.
د پېښور په بورډ بازار کې یو شمېر افغان ګډوال، په نوې بڼه افغاني جامې ډیزاین کوي. دوى وايي، چې تر څلور زره ډېر ډيزاينونه لري چې د ماشين په مرسته په عادي جامو کې لګول کیږي . دا جامې په پاکستان کې د افغان میرمنو د خوښې وړ دي او تر ډیره په ودونو کې اغوستل کیږي. شاهين اپريدی- امريکا غږ
د پیښور اوسیدونکی ثناءالله د رنګینو تارونو او میخونو په کارولو سره یو عادي تخته په درې اړخیزه یا "تري ډي" تابلو بدلوي. د نوموړي په خبره، په خیبر پښتونخوا کې یوازینی هنرمند دی چې په دې برخه کې په مسلکي توګه کار کوي.
یو شمېر افغان نرښځیان وايي د طالبانو له وېرې کډوالۍ ته اړ شوي او اوس په پاکستان کې له ګڼو ستونزو سره مخ دي.
د پيښور عالي محکمې پرېکړه کړې چې افغان اتباعو ته واده شوي پاکستانۍ ښځې د افغانستان او پاکستان دوه ګونی تابعیت لری شي. محکمې دا پریکړه هم کړې، هغه ماشومان چې له دغه مېندو او پلرونو څخه زېږېدلي وي، تر ۲۱ کلنۍ پورې خپل دوه ګونی تابعیت ساتلې شي، خو له هغه وروسته به د یو هېواد تابعیت غوره کوي.
د پېښور د بورډ په بازار کې ځايي خلک او افغان کډوال د دغو دوکاندارانو په لاس د جوړو شويو کاليو اخیستلو لپاره راځي. هټیوال وايي چې د وخت په تېرېدو سره اوس سوداګري تر ډېره په آنلاین بڼه شوې او دلته ډېر افغان هټیوال د ټولنیزو رسنیو له لارې د نړۍ په ګوټ ګوټ کې افغان لباسونه او جامې پلوري.
د افغانستان د ګیلاسو او الوبالو جوس په لنډی کوتل کې خورا مشهور دی. د جوس جوړونکي وايي، هره ورځ د تورخم له لارې له افغانستان څخه تازه الوبالو راوړي. د دې جوس مينه وال د بیلابیلو سیمو څخه دلته د جوس څښلو لپاره راځي.
د پېښور پوهنتون د حیواناتو، نباتاتو او ځنګلي څارویو یو ځانګړی موزیم جوړ کړی، چیرې چې څیړونکي نه یوازې د دې ژویو او نباتاتو په اړه، بلکې د اقلیمي بدلونونو په اړه هم څیړنې کولای شي.
په پېښور کې مېشت افغان کډوال شمس الدين د پېښوري څپليو ماهر کسبګر دی. نوموړی چې له درې لسیزو راهیسې دغه کسب او کار کوي، وايي په لاس یې جوړې شوي دودیزې څپلۍ نه يوازې په پاکستان او افغانستان کې، بلکې په خليجي هيوادونو کې هم مشتریان لري.
د پلازمېنې اسلام اباد په یو روزنیز مرکز کې یو شمېر تازه راغلیو افغان کډوالو ته په بېلابېلو برخو کې د زده کړو اسانتیاوی برابر شوي دي.
د چاپیریال ساتنې په اړه د خلکو د پوهاوي په زیاتوالي سره په پاکستان کې د بريښنايي موټرسایکلونو پیر پلور هم زیات شوی دی. د خیبرپښتونخوا په پېښور ښار کې ددغو بريښنايي موټرسایکلونو پیرودنکي وايي چې د دې سره نه یوازې په لګښتونو کې سپما کوي، بلکې د چاپیریال په پاک ساتلو کې هم مرسته کوي.
په افغانستان کې دجمهوريت له نسکورېدو وروسته د فوټبال هغه لوبغاړي چې پاکستان ته کډوال شوي له ګڼو ننګونو سره مخامخ دي. دوي وايي له يو شمېر بنديزونو سره مخ کيدو او د ښې راتلونکي په خاطر یې مهاجرت غوره کړی او وايي د اسانتیاو د نشتوالي له امله د فوټبال غوره لوبغاړي له لاسه ورکوي.
د پېښور ځایي محکمې د محرم په میاشت کې د افغانانو پر تګ راتګ بندیز لګولی دی چې دغلته مېشت افغان کډوال یې انديښمن کړي. د دوی په خبره، د محرم په شلو ورځو کې به نه یواځې ژوند ورته سخت شي بلکې کاروبارونه به یې هم ډیر تاوان وویني. شاهين افريدي - امريکا غږ
د خيبر پښتونخوا د مردان سیمې يو ځوان د معتادينو، معيوبو او د کونډو ماشومانو ته وړيا زده کړې ورکوي. په دې ښوونځي کې تر سلو ډېر ماشومان په زده کړو بوخت دي، چې له دې وړاندې به يي په کوڅو کې کثافات راټولول. دغه ځوان هڅه کوي چې دغو ماشومانو ته د زده کړو ترڅنګ لاسي هنرونه هم ورزده کړي.
پېښور کې د هوا ګرمیدو برسیره، ډیری وخت د بریښنا نه شتون خلک دې ته اړ کړي چې د ګرمې هوا له څپو څخه د ځان ژغورلو په موخه د لامبو حوضونو ته مخه کړي. شاهين افریدي د لامبو یو حوض ته ورغلی او ځوانانو سره خبرې کړي.
په پېښور کې د کډوالو د نړیوالې ورځې په مناسبت یوه غونډه وشوه چې پکې د افغان او پاکستاني ټولنو ترمنځ په ټولنیزه همغږۍ خبرې وشوې. د افغاني کلتور بېلابېل رنګونه نندارې ته وړاندې شول او افغان ځوانانو خپل وړاندیزونه وړاندې کړل.
افغانستان ته د قانوني اسنادو نه لرونکو افغان کډوالو د ستنېدو لپاره د پاکستان د حکومت له خوا د ۲۰۲۴ کال د جون تر ۳۰مې نېټې ضرب الاجل پای ته ورسېد. که له یوې خوا د افغان کډوالو د کارډ موده ختمه شوې ده، له بلې خوا له پاکستانه په زوره د ایستلو وېره هم لري.
کډوالو کمپ کې میشتې افغان مېرمنې وايي په پاکستان او افغانستان کې د ښځو لپاره د زده کړې او کار زمينه نشته. له همدې امله ډیری میرمنې د دې مهارتونو له لارې نه یوازې د خپلو کورنیو ملاتړ کوي بلکې د خپلو ماشومانو د زده کړو لګښتونه هم پوره کوي. شاهين افريدي- امريکا غږ
د طالبانو په بیا واکمنېدو سره په افغانستان کې د نجونو پرمخ له شپږم ټولګي څخه پورته ښوونځي وتړل شول او نيږدې درې کاله کیږي چې پوهنتونونو ته یې د نجونو پر تګ بندیز لګولی دی. د دولسم ټولګي څخه فارغې شوې د کانکور په تمه افغان ځوانې نجونې په پېښور کې لاسي هنرونه زده کوي۔ شاهين افريدي- امريکا غږ
په چارسدې کې له لسو بیلابیلو موادو څخه جوړ د ګوړې دغه شربت ډېر مشهور دی. په دې شربت کې د بادام، ممیزو او ناریل، میوې په ګډون لس مواد شامل دي، چې د دې ایالت له بېلابېلو سیمو څخه خلک یې د څښلو لپاره راځي. شاهین افریدی – امریکا غږ
نور پورته کول