د کندهار ولایت امنیتي چارواکې وایي چې د سپین بولدک ولسوالۍ امنیه قوماندان تیره شپه ددغې ولسوالۍ د یو پولیس له خوا چې د هغه یو نږدې همکار وژل شوی او قاتل له سیمي څخه تښتېدلی دی.
پېښه تیر شپه ناوخته د سپین بولدک ولسوالۍ په مرکز کې شوې او په پېښه کې د پوليسو دوه نور منصبداران هم وژل شوي
د کندهار د امنیه قوماندانۍ یوه ویاند غورځنګ افریدي امریکاغږ ته وويل چې د ولسوالۍ امنیه قوماندان څارمن ښایسته خان او د هغه یو ساتونکي هغه مهال، د هغه د یو بل همکار له لوري ووژل شول، کله چي د دوی ترمنځ لفظي شخړه رامنځ ته شوه .
ښاغلی افریدی وایي چې د ولسوالۍ د پولیسو د ټولي مشر محمدرضا چي د امنیه قوماندان قاتل دی له پېښې څخه وروسته له سیمي څخه وتلی، خو پوليس يې د نیولو په هڅو بوخت دي .
ښاغلی افریدی وایي " لومړني معلومات ښيي چې پېښه د ناسم پوهاوي له کبله رامنځ ته شوې، خو زموږ تحقیقات دوام لري او برید کونکی چې د پوليسو د ټولي مسئول دی تر پېښې وروسته تښتېدلی".
هغه وايي چې پېښه د یوې امنیتي ګزمي پر مهال رامنځ ته شوې، خو د اصلي انګېزې د څرنګوالي لپاره يې پوليسو تحقیقات پیل کړي.
بلخوا د سپین بولدک د پوليسو ځینې سرچينې وايي چې د پوليسو خپل منځي نښتې یو نیم ساعت دوام وکړ چې وروسته د سرحدي پوليسو په مداخلې سره پای ته ورسیدله.
دا په تیرو ۳ اونیو کې د کندهار د والسوالیو له قومندانانو څخه دوهم تن دی چې وژل کیږي
تر دې مخکې د ریګستان امنیه قومندان بسم الله خان له خپلو پنځو ملګرو سره ، د وسله والو طالبانو په برید کې وژل شوی و.
