د هند په ګجرات کې مقاماتو نن دوشنبه نومبر ۲۷ (لیندۍشپږمه) وویل چې تالندې او برېښنا په تېرو ۴۸ ساعتونو کې ۲۴ کسان مړه کړي دي.
چارواکي وايي چې د شدیدو بارانونو له کبله ۲۳ تنه نور هم مړه شوي دي.
د هند د ګجرات ایالت کې په تېرو څو ورځو کې شدید بارانونه، تالنده او برېښنا شوي دي، د دغه ایالت په ځینو سیمو کې ۱۴۴ میلی متر باران شوی.
د بارانونو له کبله په ځینو سیمو کې کورونه ویجاړ شوي دي او یو شمېر څاروي هم مړه شوي دي.
د ګجرات ایالت وزیر راګهوی پتیل وویل: «موږ به ژر یوه سروي پیلوو چې د تلفاتو دقیقه ارزونه وکړو او بیا په همدې اساس قربانیانو ته یې جبران رکړو.»
د هند د هواپېژندنې ادارې ویلي دي چې د هند په ځینو سیمو کې لا هم بارانونه روان دي.
په تېر وخت کې هم په ګجرات کې دا ډول بارانونه شوي وو. د ۲۰۲۰ د اګست په میاشت د بارانونو او سیلابونو له کبله ۱۴ تنه مړه شول او تر هغه مخکې په ورته پېښو کې ۳۱ تنه نور هم مړه شوي وو.
فورم \ دبحث خونه