جانداد، چې پر خپله اته جریبه ځمکه حبوبات لکه مي (ماش) کرلي دي، وايي: "اوبه کمې دي، او زموږ کښت د وچېدو له خطر سره مخ دی. که زموږ کښت وچ شي، د ځمکې لپاره مو چې کوم زیار ایستلی هغه له منځه ځي. له حکومت څخه غوښتنه کوو چې د برمې په وهلو کې او د کیمیاوي سرو په برابرولو کې مو مرسته وکړي."
د کندهار ډیری بزګران وايي چې د بارانونو پر مهال پریمانه اوبه موجودې وي، خو د بندونو د نشتون له کبله له اوبو څخه د اوږدې مودې لپاره ګټه نشي اخیستلی. دغه کروندګر له حکومت څخه غوښتنه کوي چې د دوی د حاصلاتو د ساتلو لپاره دې سړې خونې جوړې کړي، ترڅو حاصلات يې خراب نه شي او په ښه بیه وپلورل شي.