د لبنان صدراعظم سعد حریري په خپل هېواد کې د خلکو له مظاهرو وروسته اعلان وکړ چې استعفا کوي.
نوموړي د سه شنبې په ورځ (اکتوبر۲۹) اعلان وکړ چې خپله استعفا به ولسمشر ته وړاندې کړي خو ویې نه ویل چې کله.
په لبنان کې له شاوخوا دوو اونیو راهېسې د حکومت ضد مظاهرې روانې وې او مظاهره کوونکو د صدراعظم استعفا غوښتله.
حکومت څه موده مخکې پر یو شمېر نورو مسایلو سربېره د (وټس اپ) پر تیلیفوني مکالمو هم مالیه ولګوله چې همدغه کار د خلکو غوصه راوپاروله او د هیواد په پلازمینه بیروت کې د دولت ضد لاریونونه پیل شول.
د مظاهرو له کبله په لبنان کې لویې لارې، ښوونځي، روغتونونه او کاروبارونه تړل شوي وو.
سعد حریري شاوخوا دوه کاله مخکې په لبنان کې د ایتلافي حکومت صدراعظم شو چې په کابینه کې ورسره سیاسي مخالفان هم وو. هغه درې ځلې د لبنان صدراعظم پاتې شوی.
