د افغانستان دفاع وزارت وايي، د غزني ولایت جغتو ولسوالۍ یې تر دوو کلونو وروسته بېرته له طالبانو څخه ونیوله.
دفاع وزارت د یکشنبې په ورځ د سپټمبر پر ۲۲مه «وږې ۳۱مه» په یوې اعلامیې کې ویلي، چې د یادې ولسوالۍ د بېرته نیولو په هدف د تېرې جمعې په شپې راپدېخوا ځمکني او هوايي، عملیات پيل شوي و، چې تېره شپه د افغان ځواکونو لخوا ونیوله شوه.
بیان وايي، چې د جغتو ولسوالۍ په نیولو سره د مالستان، جاغوري، اجرستان او ناور ولسوالۍ هم له مرکز غزني سره وصل شوې.
پر همدې مهال د غزني سیمه ییز چارواکي وايي، د دغه ولایت د رشیدان ولسوالۍ د بېرته نیولو په هدف یې هم عملیات پيل کړي دي او وايي، چې طالبان یې د دغه ولسوالۍ له زیاتو سیمو څخه پر شا تمبولي دي.
د غزني د والي ویاند محمد عارف نوري د یکشنبې په ورځ د «وږې پر۳۱مه» امریکا غږ ته وویل، چې د دغه ولسوالۍ د بشپړه نیولو عملیات روان دي.
هغه وویل:"د دغه ولسوالۍ د خوندیتوب او د پروژو د عملي کولو لپاره په کافي اندازه امنیتي ځواک برابر شوی دی."
د غزني چارواکي وايي، په یادو عملیاتو کې اته وسله وال طالبان وژل شوي دي، خو طالبانو تر دا مهاله د دغه دواړو پېښو په اړه تبصره نه ده کړې.
