د افغانستان د راتلونکي کال بودیجه ۳۹۹ میلیارد افغانۍ ده چې تر نیمايي ډیره یې بهرنۍ مرستې دي.
ولسي جرګې د ډسامبر پر ۳۱ د افغانستان د ۱۳۹۸ لمریز کال ملي بودیجه تصویب کړه. د مالیې وزارت د شمیرو له مخې دغه بودیجه ۳۹۹ میلیارد افغانۍ ده چې ۲۷۵ میلیارده یې عادي او ۱۲۴ میلیارده یې پرمختیايي ده.
د بودیجې ۴۹ سلنه د کورنیو سرچینو او ۵۱ سلنه یې د بهرنیو مرستو له لارې تمویلیږي.
په بودیجې کې د حکومت لومړیتوبونو کې امنیت (۴۱ سلنه)، زیربناء(۱۴ سلنه) ، پوهنه(۱۳)، حکومتداري(۹)، کرنه او د کلیو پراختیا(۸ سلنه) شامل دي.
افغانستان څه باندې ۳۴۰ زره امنیتي او دفاعي ځواکونه لري چې د لګښتونو ډیره برخه یې د امریکا او اروپايي هیوادونو په مرستو برابریږي. افغان حکومت ژمنه کړې چې هر کال به د خپلو پوځي لګښتونو د تمویل کچه له خپلو سرچینو زیاتوي.