په داسې حال کې چې نن چهارشنبې د مې ۱۷مه (غوایی ۲۷) د عرب لیګ د بهرنیو چارو وزیران په سعودي عربستان کې ددغه لیګ د سرمشریزې د جوړیدو په موخه راټول شوي دي، ددغه ټولنې عمومي منشي احمد ابوالغیط، دغه اتحاد ته د سوریې د بیرته راستنیدو هرکلی وکړ .
سوریې له ۱۲ کلن ځنډ وروسته د روان کال د مې پر اوومه نېټه، بیرته د عرب لیګ غړیتوب ترلاسه کړ. په په عرب لیګ کې د سوریې غړیتوب له دې امله ځنډول شوې و چې ولسمشر بشار الاسد د خپل حکومت پر وړاندې لویې مظاهرې په ډېر تاوتریخوالي سره وځپل.
احمد ابوالغیط وویل: "د عرب لیګ په ناستو کې د سوریې د ګډون هرکلی کوم او هیله من یوو چې دغې ټولنې ته د سوریې بیرته راستنېدل، په دغه هېواد کې د روان کړکیچ د پای ته رسیدو پیلامه شي. سوریه په سیمه کې یو مهم هېواد دی او موږ ټول ددغه هېواد څخه ملاتړ او په هغه کې د مهمې ونډې ترسره کولو ته چمتو یوو."
سوریې په عرب لیګ کې خپل غړیتوب وروسته تر هغه ترلاسه کړ چې د روانې میاشتې په پیل کې، د عربي نړۍ لوړ پوړو ډپلوماتانو موافقه وکړه چې د سوریې حکومت لخوا د مظاهره کوونکو د ځپلو له امله په عرب لیګ کې ددغه هېواد پر غړیتوب ۱۲ کلن لګیدلی بندیز، ختم کړي.
په ورته وخت ټاکل شوې ده چې د سوریې ولسمشر بشار الاسد د جمعې په ورځ د سعودي عربستان په جدې ښار کې د عرب لیګ په سرمشریزه کې ګډون وکړي او د هغو عربي هېوادونو له ولسمشرانو سره به اوږه په اوږه ودریږي، چې کلونه یې د هغه د کمزوري کولو هڅه کوله.
د سوریې د بهرنیو چارو وزیر فیصل مقداد لا دمخه د عرب لیګ د سرمشریزې د چمتوالي په غونډو کې د ګډون لپاره جدې ته رسیدلی دی او د اردن، متحده عربي اماراتو او لبنان د بهرنیو چارو وزیرانو سره یې خبرې اترې کړې دي.
د لبنان د بهرنیو چارو وزیر عبدالله بوحبیب ویلي چې هغه له خپل سوري سیال ښاغلي مقداد سره د کډوالو د راستنیدو او په سیمه کې د نشه یې توکو د قاچاق د مخنیوي په اړه خبرې کړې دي؛ هغه دوه مهم موضوعات چې په وروستیو میاشتو کې به له سوریې سره د عربي هیوادونو د خبرو اترو منځپانګه وي.
بلخو داسې ویل کیږي چې په عرب لیګ کې د سوریې غړیتوب بیرته ژوندی کول د دې لیګ د ټولو غړیو هیوادونو د بهرنیو چارو وزیرانو په خوښې نه، بلکې د اکثریت رایو پر اساس د تړلو دروازو تر شا په خبرو کې منل شوی.
د دې اتحادیې په اعلامیې کې ویل شوي چې د سوریې د شخړې حل ګام په ګام موضوع ده او لومړی ګام به یې د عرب لیګ په غونډو کې د سوریې د ګډون پیل کیدل وي.
دې ډلې همدارنګه د سوریې د ځمکنۍ بشپړتیا څخه ملاتړ څرګند کړی او د دې هیواد څخه یې د ټولو بهرنیو ځواکونو وتل غوښتي دي.
د عربي هیوادونو ددې سازمان یو ویاند جمال رُشدي وویل چې د "یکشنبې ورځې پریکړه په سوریه کې د جګړې د پای ته رسیدو نښه نده بلکې د پای پیل دی. "
یاده دې وي چې د سوریې د کورنۍ جګړې په پایله کې له نیم میلیون زیات ددغه هېواد وګړي ووژل شول او له پنځو میلیونه زیات کسان یې کډوالۍ ته اړ شول.
