د کورنیو چارو وزارت وايي، د کابل د والي مرستیال محبوبالله محبي او یاور یې د چسپکي ماین په چاودنه کې ووژل شول.
دغه چاودنه نن سې شنبه ډسمبر ۱۵ (لېندۍ ۲۵) سهار څه کم لس بجې د کابل ښار د نهمې امنیتي حوزې اوړند «څلورم مکروریان» کې د والي د مرستیال پر لنډکروزر موټر شوې ده.
د کورنیو چارو وزارت ویاند طارق ارین ویلي چې په چاودنه کې د کابل د مرستیال والي دوه ساتونکي هم ټپیان شوي دي.
تر اوسه هیڅ کومې ډلې د دې چاودنې د کولو ادعا نده کړې.
ولسمشر غني د کابل پر مرستیال والي نننۍ چاودنه غندلې او امنیتي مسؤلینو ته یې د عاملینو د پيدا کولو سپارښتنه کړې ده:
د کورنیو چارو وزارت ویاند ویلي چې امنیتي ځواکونو په کابل ښار کې د چسپکي ماینونو ایښودونکو «هسته» نیولې او هڅه کیږي چې پاتې کسان یې هم ونیول شي.
په کابل کې د چسپکي ماینونو چاودنې پدې تازه وختونو کې ډیرې شوي.
څه موده وړاندې د افغانستان د ملي بانک د کار کوونکو په موټر هم د چسپکې ماین چاودنه شوې وه چې د طلوع د پخواني خبریال یما سیاوش او دوه نور ملګري یې ووژل شول.
د دې پیښې نه وړاندې د هلمند په ولایت کې د آزادۍ راډیو یو خبریال هم د چسپکې ماین په چاودنې کې ووژل شو.
