د افغانستان د وتلي انځورګر او اطلاعاتو ته د لاسرسي کمیسیون د غړي حمدالله ارباب پر موټر د چسپکي ماین چاودنه شوې ده.
دغه چاودنه نن یکشنبه سهار شااوخوا اته بجې د کابل ښار د اتمي امنیتي حوزې اړوند «هیوادوال بلاکو» سیمه کې شوې ده.
د کابل پولیسو هم ویلي چې دغه چاودنه په سیمه کې پر یو لنډکروزر موټر باندې شوې او پرمهال دوه تنه ټپیان شوي دي.
د افغانستان د اطلاعاتو ته د لاسرسي کمېسیون غړي حمدالله ارباب ویلي چې نوموړی له دغه چاودنې څخه روغ وتلی، خو موټر چلوونکی یې تر چاودنې وروسته په روغتون کې ساه ورکړې ده.
په کابل کې د امریکا شارزدافیر راس ویلسن پر حمدالله ارباب چاودنه غندلې او د هغه د وژل شوي موټر چلوونکي له کورنۍ سره یې خواخوږي ښودلې ده.
د حمدالله ارباب پر موټر نننۍ چاودنه په پراخه کچه غندل شوې ده.
بلخوا نن سهار ۷ بجې د کابل ښار د شپاړسمې امنیتي حوزې «تانک چکر» سیمه کې دوه تنه دولتي مامورین د ناڅرګندو کسانو په ډزو کې وژل شوي دي.
پر همدې مهال د «ملي ثبات» ټولنې په یوې اعلامیې کې ویلي چې ترور شوي کسان د دوی غړي او د دفاع وزارت کار کوونکي دي.
د یادې ټولنې په اعلامیه کې راغلي: "نن سهار د کابل احمد شاه بابا مېنه کې د ملي ثبات د سنګر دوه فعال غړي او د دفاع وزارت کارکوونکي څارنوال ویس احمد حقپال او څارنوال سید نظیف الله پاچا ناځوانه دښمن شهیدان کړل."
امریکا غږ هڅه وکړه چې په دې اړه د دفاع وزارت د ویاند نظر واخلي، خو هغوی د پرله پسې اړیکو سره سره ټلیفون ته ځواب ورنه کړ.
تر دا مهاله د دغه برید مسؤلیت کومې وسله والې ډلې په غاړه نه دی اخیستی.
