د کورنیو چارو وزارت ویاند طارق ارین وايي، دغه چاودنه نن جمعه جون۱۲ (غبرګولې۲۳) د جمعې لمانځه پرمهال شوې ده.
ښاغلي ارین ویلي چې د لومړنیو معلوماتو په اساس په چاودنه کې د یاد جومات د ملا امام مولوي عزیز الله مفلح په ګډون درې لمونځ کوونکي وژل شوي او ۸ نور لمونځ کوونکي ټپیان شوي دي.
هغه ویلي چې چاودېدونکي موادو په جومات کې ځای پر ځای شوي وو چې د لمانځه پرمهال یې چاودنه کړې ده.
د شیر شاه سوري جومات د کابل ښار په «کارته چهار» سیمه کې موقعیت لري چې د جمعې لمانځه په ګډون هر وخت پکې ګڼې فاتحې هم نیول کیږي.
دغه جومات په کابل ښار کې له مشهورو جوماتونو څخه دی.
تر اوسه د دغه برید مسؤلیت کومې وسله والې ډلې په غاړه نه دی اخیستی.
دا روانه میاشت په کابل ښار کې په جومات کې د لمانځه پرمهال دوهمه چاودنه ده چې رامنځته کیږي.
د روانې میاشتې پر ۱۴مه د کابل ښار لسمه امنیتي حوزې په وزیر محمد اکبر خان جومات کې د ماښام تر لمانځه وروسته چاودنه کې د دغه جومات پیژندل شوی امام محمد ایاز نیازی او یو لمونځ کوونکی ووژل شو او دوه نور ټپیان شول.
پر وزیر محمد اکبر خان جومات د برید مسؤلیت داعش وسله والې ډلې په غاړه اخیستی و.
