د کاپیسا امنیتي چارواکي وایي په دغه ولایت کې د چسپکي ماین چاودنې له امله پنځه ملکي وګړي وژل شوي او نهه تنه نور ټپیان شوي دي.
چاودنه نن یکشنبه جنورۍ ۳( مرغومې ۱۴) د کاپیسا مرکز اړوند صیاد بازار کې شوې ده.
د کاپیسا د امنیه قوماندانۍ ویاند عبدالشایق شورش امریکا غږ ته وویل چې چسپکي ماین د دغه ولایت د علماو شورا د رئیس مولوي میروس کریمي په موټر پسې نښلول شوی و او په موټر کې پنځته ناست کسان وژل شوي.
هغه وویل چې د چاودنې زیات قربانیان د دغه ولایت دیني علماء دي.
د کاپيسا د پولیسو د ویاند په وینا په چاودنه کې د دغه ولایت د علماو رئیس مولوي میرویس برسیرن ټپي شوی دی.
د نوموړي په خبره د چاودنې نور ټپیان عام خلک او دوکاندارن دي چې په وینا یې روغتون ته انتقال شوي دي.
تر دا مهاله د دغه چاودنې مسؤلیت کومې وسله والې ډلې نه دی منلی.
